Danskit nunanut allanut politikkiat nersualaarneqarlunilu isornartorsiorneqartoq
Naalakkersuisut nunanut allanut sillimaniarnermullu 2017-imut aamma 2018-imut suleriaasissaat Inuit Ataqatigiinneersumit Aaja Chemnitz Larsenimit nersualaarneqarlunilu isornartorsiorneqarpoq.
Taannami isumaqarpoq aningaasarsiornikkut Issittup ineriartortinniarneqarnera pisariaqarluinnartoq, Kalaallit Nunaannilu Ilisimatuut katersuuttarfittaarnissaannik pilersitsiniarneq nersualaarlugu.
Suleriaasissarli aamma amingaateqarpoq. Ilaatigut Issittup eqqartorneqarnerani USA-mut attaveqarneq eqqaaneqarsimanngimmat.
Amerikamiut Kalaallit Nunaanniinnerannut suliat tunngasut arlallit inernilerneqarsimanngitsut suleriaasissami eqqaaneqarsimanngillat. Tamannalu ima paasineqarsinnaavoq Pituffimmut sakkutooqarfiusimasunilu mingutitsinerit naalakkersuisut pingaartinngikkaat, Aaja Chemnitz Larsen oqarpoq.
Amerikamiulli Kalaallit Nunaanni sakkutooqarfigisimasaanni saliinissaq Danmarkip akilerniaraa ippassaq tusarliunneqarpoq.
EU-mi avatangiisit pillugit kommissæriusimasup Connie Hedegaardip naalakkersuisut sakkortuumik isornartorsiorpai suleriaasissami silap pissusaa oqaatsimik ataasiinnarmilluunniit eqqaasimanngimmassuk.
- Naalakkersuisut Danmark naalagaaffittut silap pissusaata allanngoriartornerata ilungersunarneranik paasinnilluarsimasutut oqaatsitigut saqqummiukkusuttarpaat, taamaattorli nuuttorpassuit pillugit immikkoortoq ataaseq ulikkaarlugu allakkamik silallu allanngoriartornera oqaatsimik ataasimilluunniit eqqaanagu malunnangaarmat naalakkersuisut nunanulluunniit allanut tunngasunut ministeri piaaraluni taamaaliornertut isigisariaqartoq kommissæriusimasup Jyllands-Postenimut oqaatigaa.
Nunanut allanut tunngasunut ministerip pingasunngormat suleriaasissaq saqqummiukkamiuk nassuiaavoq, silap pissusaata allanngoriartornera Danmarkimut naliginnaasumik ukkatassatut isigineqarmat immikkut suleriaasissami eqqaasariaqarsimanngitsoq.
