Danskit angutit assammik arsarlutik nunanut allanut unammisartut ajugaanniutivinnermut annguttut

Danskit angutit assammik arsarlutik nunanut allanut unammisartut OL-imi ajugaanniutivinnermut siullerpaamik anngupput.

Danmarkip Polen semifinalemi 29-28-mik ajugaaffigaa, OL-imilu marloriarluni ajugaasimasumut Frankrigimut sapaatiuppat ajugaanniutivittussanngorluni.

Semifinale pissanganartorujussuuvoq, danskillu arlaleriarlutik ajugaasussanngorpasittaraluarlutik unammineq allanngorartorujussuummat unamminerup naammassinissaata tungaanut tamaviaartariaqarsimapput.

Danskit målmandiat Niklas Landin arsarluataavippoq, unamminerullu naalernerani arlalerialuni unitsitsisaqattaarluni. Mikkel Hansen Morten Olsenilu danskit saassussisarnerannut maligassiuipput.

Polenip assigiinngissut 28-29-mut annikillimmagu, danskit unamminerup naammassinissaata tungaanut piffissaq ingerlatippaat.

Taamaasillutit Danskit angutit assammik arsartartut OL-imi minnerpaamik sølvinnattussanngorput.

Aamma danskeq alla arfininngornermi ullaakkut ujaminnappoq. Sulorartartormi Viktor Axelsen bronzinnanniunnermi kinamiumut tusaamasamut Lin Danimut ajugaavoq, sulorarnermilu nunarsuarmi qullersanukariartuinnarpoq.

Unamminerup immikkoortortai pingasut Axelsenimut 15-21-mik, 21-10-mik 21-17-imillu inerneqarmata danskeq ajugaavoq.

Unamminerullu immikkoortortaani marlunni kingullerni unammilluangaarmat malaysiamiunit isiginnaariartorpassuarnit tapersersorneqarpoq.

Axelsen immikkoortumi siullermi ajorsaraluarpoq, ajugaanissaalu arlaqartunit ilimagineqanngikkaluarluni.

    /ritzau/