Pisortaq: Danskisut ilinniarnissamut akiliuteqartitsiniarneq unitsilli
- Taamaaliornikkut kalaallit savalimmiormiullu, danskisut innuttaassuseqartuullutik, nunami allamiutut inissinneqarnerat tulluanngilaq.
Aarhusimi Kalaallit Illuanni pisortaq, Jørn Holbech danskit naalakkersuisuisa danskit oqaasiinik ilinniarfinni pikkorissartut, danskit oqaassinik ilinniarnerminni akiliisalernissaannut inatsisissatut siunnersuutaat pillugu taama oqarpoq.
AAMMA ATUARUK Løkke: Danskit oqaasiinik pisinnaasat pitsanngorsarnissaannut Kalaallit Nunaat ikiuuttariaqarpoq
Tamanna kalaallinut savalimmiornullu 18-ileereersimasunut aamma atuutissasoq, inatsisissatut siunnersuummi allassimavoq. Taakku kommunimiit innersuunneqarsimagaanngamik nunami allamiut assigalugit danskitoqaasiinik akeqanngitsumik ullumikkut ilinniarsinnaatitaagaluarput.
Ajornartorsiuteqareersut ilungersornerussasut
Inatsisissatut siunnersuut naapertorlugu danskisut ilinniarnermi immikkoortukkaartuni tamani aallartinneq 2.000 koruuneqassaaq. Danskit oqaasiinik ilinniarneq arfinilinnik immikkoortortaqarpoq, taamaammat 12.000 koruuninik nammineq akiliisoqartalersinnaavoq.
Tamatuma saniatigut pikkorissartut 1.250 koruunimik qularnaveeqqusiissuteqartarnissaat ukiortaamiit piumasaqaataalerpoq, taamaaliornikkut pikkorissartut atuariartortarnissaat qulakkeerneqarluni. Atuisut akiliisalernerannik periutsimut tamanna naleqquttuusoq, siunnersuummi allassimavoq.
AAMMA ATUARUK Kalaallit akeqanngitsumik danskisut ilinniarsinnaanerat peerniaraat
Tamannali kalaallinut Danmarkimi najugaqartunut, aningaasaqarnikkut unammilligaqareersunut killormuuanik sunniuteqarsinnaassasoq, Jørn Holbech isumaqarpoq.
- Tamanna inuiaqatigiinni ajattugaagaluttuinnarnissaannik isumaqangajassinnaavoq, qanormi aningaasassarsisinnaanissaat takusinnaanngilara. Aningaasaateqarpallaanngitsuunerusummi pikkorissartartuupput.
Kommunit oqaaseqanngitsut
Danskit kommuniisa oqaatsinik ilinniarfinni pikkorissartut amerlanerpaartaat ullumikkut akiliuttarpaat. Danmarkimi kommunit nuna tamakkerlugu peqatigiiffiata, KL-ip nammineq akiliisalernissamut inatsisissatut siunnersuut oqaaseqarfigerusunngilaa.
AAMMA ATUARUK Faste rammer giver succes på skolebænken
Inatsisissatut siunnersuut akuerineqassaguni ukioq manna juulip aallaqqaataanni atuutilissaaq, tamannalu Danmarkimi pisortat suliffeqarfiinut ukiuni sisamani 489 millionit koruuninik sipaaruteqarfiussasoq inatsisissatut siunnersuummi allassimavoq.
