Tuluit EU-mit aniumanerannut qallunaat oqaasertaliineri

Ministeriuneq Lars Løkke Rasmussen tusagassiortunik katersortitsinermini ilaatigut ima oqarpoq:

Taasititsineq Europap oqaluttuarisaaneranut allannguutaassaaq. Kalaallit Nunaat 1985-imili taamani EF-iusumit animmat aatsaat nunap allap suleqatigiinnissaq tunuppaa, nangillunilu:

- Tuluit Nunaanni innuttaasut amerlanerussuteqartut qinigaat ataqqisariaqarparput. Innuttaasunik taasititsinerup inernera Europamut Danmarkimullu alianarluinnartutut isigalugu isertuutissanngilara, Lars Løkke Rasmussen oqarpoq.

Aamma atuaruk Tuluit Nunaat EU-mit anisussanngorpoq

Tuluilli Nunaanni innuttaasunik taasititsinerup inernera Danmarkip EU-miittussaaneranik allanngortitsissanngitsoq Løkkip erseqqissarpaa.

Socialdemokraatit politikkikkut oqaaseqartartuata Nicolai Wammenip oqaatigaa, taasititsinerup inernerata naqissuseraa EU-mik aaqqissuusseqqittoqartariaqartoq, tuluillu naaggaarnerat ilumoorunneqartariaqartoq.
Danmarkimili partiit annersaata tulliani Dansk Folkepartiimi, EU-p inatsisartuinut ilaasortap Morten Messerschmidtip Tuluit Nunaata aalajangernera "sapiissuseqarluni aalajangernertut" taavaa.

Aamma atuaruk Tuluit Nunaat EU-mut ilaasortaajunnaassappat Nunatsinnut sunniuteqarsinnaasoq

Aamma Danmarkip EU-mut atanera pillugu Danmarkimi innuttaasunik taasititsisoqassappat, Danmarkip EU-mit aninissaanut aqqutissiuussisinnaavoq, Morten Messerschmidt aviisimut Politikenimut taama oqarpoq.