Danskit politikerii kalaallit meerartaannik ikiuinissaminnik piareersimapput
Folketingimi Kalaallit Nunaat pillugu ataatsimiititaliami ullumi ataatsimeeqatigiittoqareernerani danskit partiivi arlaqartut taama nalunaarput. Ataatsimiinnermi ilaatigut isumaginninnermut naalakkersuisoq peqataavoq.
Kalaallit Nunaalli ikioqqusimanngilaq.
Aamma atuaruk Martha Lund Olsen meeqqat pillugit nassuiaateqartussanngortoq
Kalaallit meerartaannut inuusuttaannullu immikkut ikiuunnissaminut Danmark piareersimasoq, nunarput pillugu Konservativit oqaaseqartartuat Rasmus Jarlow oqarpoq.
- Danskit partiivisa tungaanniit oqarpugut arlaatigut ikiuukkusuttorujussuulluta. Kalaallit Nunaanni isumaqartoqarpat ikiorneqarnissamik pisariaqartitsillutik danskit tungaanniit ikiuussinnaavugut. Taamaallaat Kalaallit Nunaata oqaluttuukkunitigut sutigut ikiuutissanersugut, Rasmus Jarlow KNR-imut oqarpoq.
Nunarput pillugu ataatsimiititaliami ataatsimeereernerup kingorna ilaqutariinnermut, naligiissitaanermut isumaginninnermullu naalakkersuisoq Martha Lund Olsen oqaaseqartissinnaasimanngilarput.
Aamma atuaruk Aaja: Kalaallit meerartai ikiorniarlugit danskit aningaasaliissagaluarput
Rasmus Jarlowili ataatsimeeqataasimasullu allat naapertorlugit ataatsimiinnermi Kalaallit Nunaannit Danmarkimut ikioqqqunermik minnerpaamilluunniit kissaateqartoqanngilaq.
- Naamik, Kalaallit Nunaata aalajangersimasumik kissaateqarfiginngilaatigut, Martha lund Olsenilu danskinut aalajangersimasumik tikkuussinngilaq. Taamaaliorsimasuuppat ingerlaannaq tapiisimassagaluarpugut.
Rasmus Jarlow oqarpoq qanorluunniit ikiuuttoqarsinnaasoq - aamma aningaasatigut - tamanna naalakkersuisut soqutigippassuk.
Aamma atuaruk Søren Espersen: Isumaginninnermut suliassaqarfik Danmarkip tigugallartariaqarpaa
Enhedslistenimi nunarput pillugu oqaaseqartartoq Finn Sørensen oqarpoq naak Kalaallit Nunaata oqartussaaffik tigoreeraluaraa Nalagaaffiit Peqatigiinni inatsisit eqqarsaatigalugit imaasiinnaasoq ileqqoq atorunnaarseriataarsinnaasoq.
- Kalaallit Nunaat - naalagaaffeqatigiillu tamaasa sinnerlugit Danmarkip Naalagaaffiit Peqatigiit meeqqat pisinnaatitaaffii pillugit isumaqatigiissutaat atsiorsimavai. Taamaattumik inatsisitigut uagut akisussaanerpaavugut. Isumaqarpungalu tunngavilersuutigisinnaallugu immikkut pisumi uani maannamut ileqquusut atunngitsoorsinnaallugit. - Kisiannili tassa - piumasaavoq - Kalaallit Nunaata ikioqqunissaa, Finn Sørensen oqarpoq.
Aamma atuaruk Ataatsimiititaliaq: meeqqanut inuusuttunullu suliniarnermut aningaasat amerlanerusut
Aamma atuaruk VIDEO Meeqqanik sumiginnaasarneq pillugu oqallinneq takoqqiguk (Qinersineq 2014)
