Dansk Folkepartip siuarnera IA-p isumakulunnartippaa
Dansk Folkeparti Danmarkimi qinersinermi ajungaanera IA-p siulittaasuata Sara Olsvigip isumakulunnartippaa.
Qinersinerup inernerata Atlantikup avannaamiuisa qinigaasa ataatsimoornissaat nukittunissaallu pingaaruteqalersikkaa, taanna erseqqissaavoq.
- Dansk Folkepartip taama angitigilersimanera, Inuit Ataqatigiinniit soorunami immikkut maluginiarparput. Erseqqissumillu oqaatigeqqissavara, Naalakersuisooqatigiit Dansk Folkepartiimiit aqunneqartut, uagut ungasissorujussuuffigissavagut, tapersersorsinnaassanngilagut, IA-p siulittaasua Sara Olsvig oqarpoq.
Aamma atuaruk Aajap suleqatigiinnissaq qajannartikkaa
Dansk Folkeparti naalakkersuisoqatigiinni peqataalissappatta, kalaallit partiivisa siunissamut kissaataasa ilapparssuisa piviusunngortinnissat ajornakusuulissasoq, Sara Olsvig isumaqarpoq.
IA-mersut qinigaalluarnerat taassuma nuannaarutigaa, Aaja Chemnitz Larsenillu Christiansborgimut isumaqatigiinniariartornissaa tulluusimaarutigalugu.
Aamma atuaruk Talerperliit ajugaanerat Kielsenip ajuusaarnartippaa
Partiili ullumimiit sulilereertoq, taanna oqarpoq:
- Uagut suleqatissagut qaninnerusut attaveqarfigaagut, Savalimmiormiut Tjóðveldimeersoq Høgni Hoydal attaveqarfigereerparput, taavalu partiit saamerliusut aamma attaveqarfigiumaarpagut.
Danmarkimi sapaatit akunnerini pingasuni qineqqusaarnermi talerperliit saamerliillu ima naligiitsigaat, allaat Atlantikup avannaani qinigaasut qinersinermi aalajangiisuussasutut ilimagineqaraluarlutik.
Aamma atuaruk Aviisi: Danmarkimi amerlanerussuteqartut Atlantikup avannaamiut qinersinermut sunniuteqarnissaat kissaatiginngilaat
Kisianni naak Nunatsinni Savalimmiunilu qinigaasut sisamat naatsorsuutigisaagaluatut sunniuteqartussaajunnaaraluarlutik pingaarutilinnik suliassaqaqisut, aammalu ataatsimoornissaat pingaartoq, Sara Olsvig isumaqarpoq.
- Naalakkersuisooqatigiissani danskit suli isumaqatiginninniarlutik naammassinngillat. Kisianni soorunami uagut suleqatissagut qaninnerusut attaveqarfigaagut.
Folketingimi partiinut saamerlernut attaveqalereerlutik, Sara Olsvigip aamma oqaatigaa.