IA-p Dansk Folkeparti kalaallinik ataqqinninnginnerarpaa
Ataatsimiititaliani inuttalersuinissamut isumaqatigiinniarnerni talerperliit ataasinngormat Nunarput pillugu ataatsimiititaliamut siulittaasunngortitserusulermata Siumut Inuit Ataqatigiillu isornartorsiuipput.
Dansk Folkeparti talerperlerni partiini annersanut tullersortinngortuni isumaqarput siulittaasuuffik arlaannaannulluunniit qulakkeereerneqarsinnaanngitsoq.
- Kalaallit Nunaat Savalimmiullu pillugit ataatsimiititaliami Folketingimi ataatsimiititaliatulli ingerlapput. Siulittaasup kalaallimik inuttalerneqarnissaa inatsisitigut malittarisassaqanngilaq, Dansk Folkepartiip nunarput pillugu oqaaseqartartua Søren Espersen KNR-imut oqarpoq.
Kalaallit saamerlermik taasinerannik akiniaaneq
Kalaallit folketingimiittuutitaasa paarlakaallutik siulittaasuusarneri atorunnaarsikkaanni tupinnartuussasoq aammalu Danmarkip Nunattalu akornanni pissutsit ajortissinnaagai, Aleqa Hammond aamma Aaja Chemnitz Larsen isumaqarput.
Aamma atuaruk Kalaallit Nunaannut ataatsimiititaliami siulittaasuuffik talerperliit piumasaraat
Dansk Folkepartiilli erseqqissarpaa, kalaallit partiivisa kina ministeriuninngussanersoq aalajangiiffigeqataasinnaappassuk, aamma nunarput pillugu ataatsimiititaliaq inuttaliiffigineqarnissaminut suli ammasoq.
- Talerperliit saamerliillu akornanni taasinerit 180.000-nik nikingapput. Taavali ilaasortat sisamat takkupput illukaatitsingajallutillu. Ilutigitillugulu immikkut pineqarusullutik. Ajoriffissaqartinngilara Kalaallit Nunaat pillugu ataatsimiititaliami kalaallinik siulittaasoqarnissaa, tamannali malittarisassaanngilaq. Isumaga malillugu ataatsimiititaliami siulittaasunngortoqarsinnaavoq, kina Danmarkimi ministeriuninngussanersoq aatsaat akulerussorfiginngikkaanni, Søren Espersen oqarpoq.
Chemnitz Larsen tupaqqavoq
Dansk Folkepartiimeersup oqaasianut Folketingimut ilaasortaq Inuit Ataqatigiinneersoq Aaja Chemnitz Larsen ima oqaaseqarpoq:
- Uagut kina ministeriuninngussanersoq aalajangiiffigereerusunngilarput. Talerperliit saamerliilluunniit aamma toqqareerusussimanagit.
- Isumaqarpunga inuiannik kalaallinik ataqqinninnginneruallaartoq, aammalu Kalaallit Nunaanni nammineq atukkatsinnut sunniuteqarusunnitsinnut.
- Isumaqatiginngilara oqarmat Kalaallit Nunaat pillugu ataatsimiititaliaq ataatsimiititaliatut allatulli ittuusoq. Oqartussaaffiimmi amerlaqisut Nunatsinni suli oqartussaaffigilinngisagut Danmarkimit tigummineqarput, aammali Danmarkip Nunattalu akornanni, Kalaallit Nunaata nunarsuullu sinneranut attaveqarnermut attuumassuteqartorujussuupput.