Suka: Danmarkip saliinissamut pisussaaffini qimarratigisinnaanngilaa
- Danmarkip saliinissamut pisussaaffini qimarratigisinnaanngilai.
Kangilinnguit ammaqqinneqarnissaanik Illersornissamut ministereqarfimmit isumaliutersuutigineqartoq KNR-imit saqqummiunneqareersoq, avatangiisinut naalakkersuisoq Suka K. Frederiksen taama oqarpoq.
AAMMA ATUARUK Kangilinnguit ammaqqinnissaa illersornissaqarfiup isumaliutigigaa
Nutaarsiassap saqqummernerata kingorna danskit isumaliutersuutaat itisileqqullugu Illersornissamut ministereqarfik Namminersorlutik Oqartussanit nukingiussamik ataatsimeeqatigiumaneqarpoq.
- Kangilinnguani siunissami qanoq pisoqassagaluarpalluunniit, avatangiisit sumiiffimmilu mingutsitsinerup isumagineqarnissaat pisariaqarluinnarpoq, Suka K. Frederiksen tusagassiuutinut nalunaarummi allappoq.
Kangilinnguani nuna uuliamik annertuumik mingutsinneqarsimavoq. Arsullu kangerluanut uuliakoortoqassanngimmat, mingutsitsineq salinneqassasoq, Namminersorlutik Oqartussat piumasaraat.
