Kielsen: Danmarkip NATO-mit akikillisaavigineqartarnera takussutissaqanngitsoq
Danmarkip NATO-mut ilaasortaanermini Pituffik pissutigalugu akikillisaavigineqartarneranut takussutissaqarnersoq, Demokraatit sinnerlugit Inatsisartuni ilaasortat Justus Hansen Randi Vestergaard Evaldsenillu paaserusuppaat.
Nunanummi allanut tunngasunut naalakkersuisup Vittus Qujaukitsup Politikenimut qanittukkut oqaatigaa Danmark NATO-mut ilaasortaanerminut akikillisaavigineqartartoq. Naalakkersuisulli siulittaasuata Demokraatit sinnerlugit Inatsisartunut ilaasortanut akissutaani ima ilaatigut allassimavoq:
- Danmark NATO-mut ilaasortaanerminut akiliutiminit akikillisaavigineqartartoq toqqaannartumik Thule Air Base pissutaalluni. upernarsaatissaqarnersoq Naalakkersuisut ilisimanngilaat.
Naalagaaffiillu NATO-mut ilaasortaasut ilanngaasiinnginnermi nunami namminermi tunisassiornerata 2 procentiata annertoqataanik illersornissamut aningaasartuutinut ukiumut akiliuteqartarnissaat aalajangerneqarnikuusoq, piumasaqaatigineqartorlu taanna Danmarkimit malinneqanngitsoq.
AAMMA ATUARUK Pituffik pillugu ukioq manna 2016-imi suliaq
Danmarkillu illersornissamut siorna aningaasartuutai 20,3 milliardit koruuniummata, tamanna nunami namminermi tunisassiornerup 1 procentiata sinnilaarluguluunniit nalinganik illersornissamut siorna aningaasartuuteqarpoq.
Danmarkili nunani NATO-mi ilaasortaasut akornanni kisiartaanngilaq akiliuteqartarnissamut piumasaqaatinik malinninngitsoq.
NATO-p kisitsisaatai naapertorlugit nunat NATO-mut ilaasortat 28-usut akornanni taamaallaat tallimat akiliuteqartarnissamut piumasaqaatinik malinnittuupput, tassa nunami namminermi tunisassiornerup 2 procentiata annertoqataanik illersornissamut aningaasartuutinut ukiumut akiliuteqartarlutik.
Taamaammat Danmarkip ilaasortaanerminut akikillisaavigineqartarneranut takussutissaqanngitsoq, Kim Kielsenip akissutaani ilaatigut atuarneqarsinnaavoq.