Danmarkip Brexit pillugu isumaqatigiinniarnerni Nunarput Savalimmiullu peqataatinniarai
Danskit nunanut allanut tunngasunut ministeriata Anders Samuelsenip ministeriunerullu Lars Løkke Rasmussenip tamanna nassuerutigaat.
Løkkep Folketingip oqaluttarfianit sapaatit akunnerata siuliani oqaatigaa, danskit naalagaaffiata Tuluillu Nunaata akornanni nutaanik isumaqatigiissusiortoqartussanngorpat Naalagaaffeqatigiit soqutigisaat qularnaarumallugit Ministeriuneqarfiup ataani suligasuartussat Nunarput Savalimmiullu oqaloqatigigaat.
Løkkep tamatumunnga peqatigitillugu aamma ilisimatitsissutigaa Nunatta Savalimmiullu tulunnut "isummaminnik saqqummiussinissaat" Danmarkip Londonimi aallartitaqarfiata ammaffigigaa.
Tamannalu danskit nunanut allanut tunngasunut ministeriata Anders Samuelsenip folketingimut ilaasortamut Aaja Chemnitz Larsenimut allakkamini uppernarsarpaa. Danmarkip EU-mi siinniisaata Bruxellesimiittup EU-mi sullissivinnik attuumassuteqartunik Brexit pillugu isumaqatigiinniarnerit Nunatsinnut Savalimmiunullu sunniutissai pillugit ataatsimeeqatigalugit ikiuussimasoq allakkamini aamma ilisimatitsissutigaa.
