Namminersorlutik Oqartussat: Danmarkimi suliumajunnaartoqassappat nunatsinni timmisartuussinerit eqqorneqarsinnaapput
- Naalagaaffik isumaqatiginninniarnerni aaqqiissutissamik nassaanngippat, tamanna Danmarkimi silasiortunut DMI-meersunut ilaannakortumik eqquissaaq, Kalaallit Nunaannullu tamanna assigiinngitsorpassuartigut eqquissaaq, Attaveqaqatigiinnermut naalakkersuisoqarfimmi pisortaq Ruth Lindhardt, KNR-imut mailikkut allakkamini ilaatigut taama oqarpoq.
Timmisartoq Kalaallit Nunaannukartussaq qangattarpat, tikitassamilu silassamik nalunaarummik sukumiisumik tigusaqarsimanngikkuni, taava timmisartortitseqatigiiffiup mittarfissat allat marluk periarfissatut timmisartortartunut inatsisit naapertorlugit nalunaarutigisussaatitaavaat. Danmarkimili suliumajunnaartoqalissagaluarpat DMI silassamik Kalaallit Nunaanni mittarfinnut tamanut nalunaarusiorsinnaanngilaq, taamaassappallu timmisartut Kalaallit Nunaannukartinneqarsinnaassanatik.
- Silaannakkut angallanneq Kalaallit Nunaanni taava unitsivinneqassaaq, Air Greenlandimmi inatsisitigut pisussaaffini naammassisinnaassanngimmagit, Attaveqaqatigiinnermut naalakkersuisoqarfiup pisortaa Ruth Lindhardt oqarpoq.
Air Greenlandip timmisartorsua Airbus suli Københavnimit Kangerlussualiarsinnaassaaq. DMI-lli Kangerlussuarmut silamik ilimasaarutit aamma akisussaaffigai, Namminersorlutik Oqartussat taama nalunaaruteqarput.
Namminersorlutik Oqartussat ajornartorsiut Naalagaaffimmut ilisimatitsissutigereerpaat, isumaqatiginninniarnernilu inerneriumaartussat utaqqillugit.