Danmarkimi peqqissutsimut aqutsisoqarfik nunatsinni peqqinissaqarfinnut ilisimatitsisarsimanngilaq
Tarnikkut nappaatinut nakorsaq sullitaminut arlalinnut ukiuni arlalinni kukkusumik katsorsaasarsimasoq, piffissami kingullermi paasineqarpoq.
Taanna Danmarkimi tusagassiorfinni qaammatini kingullerni assut sammineqarpoq - ilaatigut Danmarkimi peqqissutsimut aqutsisoqarfimmi pisortap soraarsinneqarneranik kinguneqarluni.
Tamanna pivoq tarnikkut nappaatinut nakorsap kukkusumik katsorsaasanera pillugu Danmarkimi peqqissutsimut aqutsisoqarfimmit aarlerisaarutinik arlalinnik tunineqartarsimammat, taassumali sulinerminut pisinnaatitaanera atorunnaarsinneqarsimanani. Tarnikkut nappaatinut nakorsaq taanna tarnimikkut napparsimasunik ukiuni arlalinni katsorsaasarsimavoq aamma Nunatsinni.
Tamannalu pillugu Inuit Ataqatigiit sinnerlugit Folketingimi ilaasortaq Johan Lund Olsen Danmarkimi peqqissutsimut ministerimut apeqquteqarpoq nakorsaq taanna pillugu sooq Kalaallit Nunaanni oqartusat ilisimatinneqarsimannginnersut.
Tassunga ilanngullugu Johan Lund Olsenip apeqqutigaa Danmarkimi peqqinnissaqarfinni atorfillit pisinnaatitaanermik annaasaqaraangata sooq Kalaallit Nunaat ilisimatinneqarneq ajornersoq. Taamatut ilisimatitsisarneq nunani avannarlerni isumaqatigiissutaalluni atuutsinneqarmat.
Taassuma saniatigut suliat allarpassuit akissutissarsineqarnissaat Johan Lund Olsenip piumasaraa Ukiut kingulliit qulit eqqarsaatigalugit peqqinnissaqarfimmi, piginnaatitaanerminnik annaasaqarsimanersut imaluunniit annikillisamik atuuttussanngortitaasimanersut, taakkunanngalu qassit Kalaallit Nunaanni peqqissutsimut oqartussaqarfinnut nalunaarutigineqartarsimannginnersut ministerimit ilisimatitsissutigineqaqquneqarput