Danmarkimi partiit annersaata aqqa allanngorpoq

Socialdemokratit taaguutertik Socialdemokraterne atorunnaarlugu pisortatigut taakkartorneqarnermini Socialdemokratiet maannamiit atulerpaat. Partiimi allatsi Jan Juul Christensen Ritzauimut taama paasissutissiivoq.

- Piffissami sivisuumi atit marluk taaguutigaagut.

- Maannalu erseqqissaatiginiarparput, ’Socialdemokratiet’-iulluta ukiunik 145-nik oqaluttuassartalik.

 Mette Frederiksenip siulittaasuunermini ateq ’Socialdemokratiet’ atortaraa, kingoraagaatalu Helle Thorning-Schmidtip partiini ’Socialdemokraterne’-mik taagoraa maluginiarneqareerpoq. 

Taaguutillu allanngortinnera piffissamut Thorningip siuttuunerata nalaani pisunut isumaqatiginninnginnerunngilaq.

- Ateq ’Socialdemokraterne’ Poul Nyrup Rasmussenimit pilersinneqarpoq. Taamaammat inunnik ukiunillu inuulluaqqusisariaqanngilagut, Jan Juul Christensen oqarpoq.

Aamma atuaruk Mette Frederiksen Nunatsinni angalasoq

- Inuiaqatigiit naligiinnerunissaannut inuiaqatigiillu naapertuilluartumik inissisimanissaannut partiitta oqaluttuarisaanerani sorsuutigiuarsimasagut takutissinnaagigut neriuutigaarput. 

Atimik allanngortitsineq partiip Aalborgimi tallimanngornermi ataatsimeersualernerani atulersinneqarpoq. Aterlu 'Socialdemokratiet 'atortuni assigiinngitsuni erfalasunilu naqinneqarsimavoq, kiisalu partiip nittartagaata atitoqartik nutaatut atulerpaat.

Partiip malittarisassaani allassimavoq ”Socialdemokraterne Socialdemoratietimi aaqqissuunneqarpoq.” Taamaammat atip allanngortinnissaanut malittarisassanik allanngortitsisoqartariaqanngilaq.

- Socialdemokratiet partiiuvoq, taamaammat tamatta socialdemokratiuvugut. Ukiunik 145-nik oqaluttuassartaqarpugut, oqaluttuamullu tassunga maanna ilannguteqqippugut, Jan Juul Christensen oqarpoq.
 
/ritzau/