Danmarkimi Nunat Avannarlerni suleqatigiinnermut ministeri nutaaq

Danskit naalakkersuisortaavi sapaatiummat imminnut ilisaritipput, saamerliuniallu ikinnerussuteqalernertik kinguariaateqarnertillu unamminartissagaat, Inuit Ataqatigiit siulittaasuat Sara Olsvig oqarpoq.
juunip 29-at 2015 14:12
Nutserisoq Sandra Meinecke

Illersornissamut ministerinngortup, Carl Holstip suliami saniatigut Nunat Avannarlerni suleqatigiinnermut ministerinngornera Sara Olsvigip danskit naalakkersuisortaavini immikkut maluginiarsimavaa.


- Tassanilu Nunarput issittorlu eqqarsaatigineqarsimassasoq naatsorsuutigaara, tassami Nunat Avannarliit akornanni illersornikkut suleqatigiinneq issittumut tunngatillugu ukiuni makkunani annertusingaluttuinnarpoq, Inuit Ataqatigiit siulittaasuat, Sara Olsvig oqarpoq.

Illersornissamut Nunanullu Avannarlernut suleqatigiinnermut ministerinngortup, Carl Holstip nunatsinni illersornissamut tunngasut suliassaa siulliussasoq, Sara Olsvigip takorloorpaa.


- Nunatsinni illersornissamut issittumullu tunngasut taassuma suliassat siulliit ilaanniissasut allutissagaalu takorloorpara, Sara Olsvig oqarpoq. 

 

Aamma atuaruk Aajap naalakkersuisut eqqaaseqqinniarpai


Taassuma saniatigut Nunanut Allanut tunngasunut ministerinngortoq, Kristian jensen, suleqatikkuminarnerarpaa, nunatsinnulli ilisimasai killeqarnerarlugit. Taamaammat nunatsinniit ilaasortat issittumut nunatsinnullu tunngasunik Kristian Jensenimut paasissutissiilluartarnissaat, taassumalu ataatsimeeqatigilluartarnissaa pingaaruteqartoq, Sara Olsvig oqarpoq.

 

Aamma atuaruk Naalakkersuisut nutaat aajukua

 

Inatsiseqarnermut tunngasunut ministerinngortoq, Søren Pind, Nunarput pillugu ilisimasaqarluartoq, kisiannili namminiussuseqarluartuugami qanoq suleriaaseqassanersoq, Sara Olsvigip pissanganartippaa.

Saamerliit ikinnerussuteqarnertik pissutigalugu suleqatiserinnittuartariaqassasut, Sara Olsvigip oqaatigaa.


- Soorunami ikinnerussuteqangaatsiarput, taamaammat pinngitsuunngiivillutik folketingimiittunit partiinit tamanit suliassamiit suliassamut  suleqateqartariaqartassapput. Taamaammat atlantikup avannaaneersugut tassuunatigut sunniuteqarsinnaannerput isumalluarfigaara, Inuit Ataqatigiit siulittaasuat, Sara Olsvig oqarpoq.

 

Aamma atuaruk Kalaallit kissaataat Løkkemut saqqummiunneqarput