Danmarkimi katersugaasivissuaq amminik atisaliat pillugit saqqummersitsilersoq

 
Issittumi amminit suliat assigiinngitsut oqaluttuarisaanermi pingaarutillit saqqummersinneqassapput, soorlu ullutsinni piniarnermit, meqqulinnillu uumasuuteqarnikkut amminit pisunik atisaliat saqqummersinneqarlutik.
Kulturi, atisat mutit, inuulluataarnermi ileqqorissaarnissaq, uumasunik illersuineq, nunallu inoqqaavisa pisinnaatitaaffii pillugu saqqummersitsisoqarpoq.
 
Amminit suliat katersat nunarsuarmi annerit ilaat Danmarkip katersugaasiviata pigai, amminit suliat Issittumeersut katersaatigineqarlutik.

AAMMA ATUARUK Amminik atisaliat pillugit saqqummersitsinissaq piareersarneqaleruttorpoq

Amminit suliat 1850-ip missaannit 1950-ip tungaanut katersorneqarsimapput, Nunatsinnit, Canadamit, Alaskamit, Sibiriamit Skandiaviamilu Saamit nunaannit katersorneqarsimallutik.
 
Meqqulinnik uumasuuteqarneq ullutsinnilu piniartarnerit saqqummersitsinermi aamma sammineqarput.
 
Meqqulinnik uumasuuteqarnermik tapersersuisut oqaatigaat tamakkunanit tunisassiorneq Danmarkip avammut tunisassiarisartagaasa annerit pingajorigaat, suliffissaqartitsilluarlunilu aningaasarsiornermut pingaaruteqarlunilu illersorneqarsinnaasumik ingerlanneqarnera oqariartuutigalugu.
Akerliusut tunngavilersuuteqarnerminni ilaatigut oqaatigaat taamatut uumasuuteqartarneq uumasunik naalliutsitsinerusoq, amminillu pisunit atisaqarniaannarluni uumasunik toqutsisoqartarnera apeqquserlugu.
 
Amminilli pisunit nunat ilaannut tuniseqqusaanngittoqarnera pissutaalluni Issittumi piniartut aningaasarsiornerat eqqorneqarnerluttoq aamma oqaatigineqartarpoq.
 
Danmarkimi katersugaasivissuarmi saqqummersitsineq "Pels - liv eller død", aappaagu februaarip 22-ata tungaanut takuniarneqarsinnaassaaq.