Danmarkimi inuusuttut ikiorniarneqalersut
- Paasianiaqqaarniarparput kikkuunersut, suminngaaneernersut, sunik takorluugaqarnersut sunillu pilersaaruteqarnersut, Københavnimi kalaallit illuutaani pisortaq Leise Johnsen oqarpoq.
Kalaallit Illuutaata inuusuttunik inooqataanermikkut ajornartorsiortut SNA-t, tassa suliniaqatigiiffiit naalakkersuinermut attuumassuteqanngitsut, arlallit suleqatigalugit taanna nassuiaavoq.
- Suleqatigiittussaavugut. Taamaammat paasissutissanik ataasiusunik pissarsissaagut, inuusuttut iluaqutaasumik ikiorniassagatsigit, Leise Johnsen taama oqarpoq.
Inuusuttut ikiorneqarnissamut assigiinngitsunik periarfissaqareerput, ilatigut kommuneniit. Periarfissat ilagaat nunatsinnut utersinnaanissaat, ilaatigullu ilinniaakkamik aallartitsisinnaanissaminnut periarfissinneqassallutik.
Inuusuttulli piginnaasaat misissorneqaqqaassapput:
- Tassa meeqqat atuarfianni sumut killissimanersut piginnaasallu allat killiffittut atorsinnaasaat, Københavnimi Kalaallit illuanni pisortaq Leise Johnsen KNR-mut oqarpoq.
Inuusuttunut ikiuiniarnermi suliniutillit arlaqarput. Kalaallit illuataata saniatigut, Hjemløseenheden, tassa Københavnip kommuneani angerlarsimaffeqanngitsunut persuttagaasimasunullu sullissisut, Kofoeds Skole aamma peqatigiiffik kalaallit meerartaat. Aamma Aktivitetscentret Sundholm, inuusuttut innuttaasullu inuuniarnermikkut ulorianartorsiortut orniguttarfiat, tavalu LivaRehab, tassa ilaatigut inuit akilersillutik atoqarteqartarnermikkut ajoqusersimatillutik saaffiginnittarfiat suleqataassapput.