Danmark nunanut sorsuffiusunut sakkutuunik aallartitseqqilersoq
Timmisartut malersuutit F-16-it sisamat, timmisartoq assartuut Hercules ataaseq, sakkutuullu 400-ngajaat aasaru taava Syrialiartinneqarlutillu Irakilinarnissaat qaammatinilu arfinilinni taavaniinnissaat amerlanerussuteqarluartut tapersersorpaat.
Taakkunani sakkutuut immikkut sungiusakkat 60 Irakimi sakkutuunik sungiusaasussatut siunnersuisartussatullu sulisinneqassapput, sivisunerpaamilli ukiumi ataatsimi Irakimiitinneqassallutik.
Danmarkip nunanut sorsuffiusunut sakkutuuliinissaanut nalunaarut Nunatsinnit Savalimmiormiuniillu tupaallaatigineqarpoq, sakkutuuliiniartoqarnera siumut nalunaarutigineqarsimanngimmat.
Aamma atuaruk Naalakkersuisut sakkutuunik Syrialiartitsinissaq pillugu ilisimatinneqarsimanngillat
- Danskit naalakkersuisuisa siunnersuuteqarnerannut tunuliaqutaasunut ilisimatinneqarpunga(...). Danskit sakkutuuisa sorsugiartitaanissaannut Nunatta tusarneqarnissaa tunngaviusumik kissaatigigaluarpara. Kisianni namminersorneq pillugu isumaqatigiissummi erseqqissumik allaqqavoq, illersornissamut politikki Danmarkip naalagaaffeqatigiit sinnerlugit ingerlakkaa, Nunanut allanut tunngasunut naalakkersuisoq Vittus Qujaukitsoq allappoq.
Savalimmiormiut aamma aalajangernermut peqataatinneqannginnerat Savalimmiut Folketingimi ilaasortaatitaasa isornartorsiorpaat.
Danmarkip Syriami Irakimilu sakkutuuliinissaanut siunnersuutip Enhedslistenimit, Alternativetimit SF-imiillu tapersersorneqarnissaa naatsorsuutigineqarpoq.
Aamma atuaruk Inatsisartut Lagtingilu sorsunnissamik aalajangernermut tusagaqarsimanngillat
Aamma atuaruk Danmark sakkutuunik Syrialiartitsilersoq