Naalagaaffeqatigiit atatsimiinnerannit: Danmarkip Kalaallit Nunaat ikiussavaa

Ministeriuneq Lars Løkke Rasmussen naalagaaffeqatigiit Ilulissani sisamanngormat ataatsimiinneranni taama neriorsuuteqarpoq.

- Tuluit Nunaat EU-mi ilaasortaajunnaarpat, isumaqatigiissutinik ajunngitsunik qulakkeerinninnissaq pisariaqassaaq, ministeriuneq oqarpoq.

Kalaallit Nunaat EU-mik arlalinnik isumaqatigiissuteqarpoq, aalisarneq pillugu naammaginartumik isumaqatigiissuteqartillugu nunarput aalisakkanik akiitsuutitaqanngitsunik EU-mut tuniniaasinnaanermut isumaqatigiissut  taakkununnga ilaavoq, 

Isumaqatigiissullu taanna Kalaallit Nunaata Tuluit Nunaannut atorluarpaa, kalaallimmi raajarpassuarnik Tuluit Nunaannut tunisisarput.

Kalaallit Nunaat Tuluit Nunaannut 680 milliuunit koruunit nalinginut siorna tunisivoq.

Taamaammat Tuluit Nunaat EU-mit ilaasortaajunnarpat, Tuluit Nunaannik nutaamik isumaqatigiissusiornissamut Kalaallit Nunaat pisariaqartitsissaaq.

Tuluit Nunaata  nalunaarutigereerpaa, niueqatigiinnikkut tunngasunik ukiup ataatsip ingerlanerani allannguisoqassanngitsoq. Akitsuutinut tunngasut uani aamma pineqarlutik.

Taamaalilluni Kalaallit Nunaata Tuluit Nunaannik niuernikkut ukiup ataatsip ingerlanerani isumagiissusiorniarnissaq periarfissarilerpaa.

- Tassani Kalaallit Nunaata Tuluit Nunaannut tuniniaanissamut pitsaanerpaamik periarfissaqarnissaa isumagissallugu suleqatigiittussaavugut,  Lars Løkke Rasmusssenilu taama neriorsuivoq.