Corona: Killilersuutit nutaat

Qanermut assiaqut, coronapas, imerniartarfinni neriniartarfinnilu isersimaqqusaasut affaannaat kisimik isersinnaatitaaneri.

Tamakkuupput unnuap qeqqaniit killilersuutit nutaat atuutilertussat.

Allaanerussuteqangaatsiassappullu.

Nunatsinni tamarmi aqqaneq-marluleereersimasut tamanit ornigarneqarsinnaasunut iserniarunik coronapasimik ullumikkut takutitsisinnaassapput. Tassa soorlu neriniartarfinni, kulturikkut illorsuarmut, atuakkanik atorniartarfinni aammalu sutorniartarfinni.

Taakku allannguiffiussapput.

Illoqarfinni nunaqarfinnilu sapaatini akunnerni marlunni kingullerni coronamik tuniluunnerup aallaavia ilisimaneqarani tunillatsittoqarpat coronapasimik takutitsisinnaaneq taamaallaat atuutissaaq.

Naalakkersuisut tusagassiutinut nalunaarumminni taama allapput.

Illoqarfiit nunaqarfiillu pineqartut nakorsaaneqarfiup nittartagaani, nun.gl-mi saqqummersinneqartassapput.

Illoqarfik nunaqarfilluunniit allattorsimaffinnut ilanngunneqaruni, taava killilersuutit pingasut atuutilertassapput:

• Coronapasimik takutitsisinissamut piumasaqaat
• Tamanit ornigarneqarsinnaasuni isersimasinnaasut amerlanerpaaffissalernerat - tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.
• Sumiiffinni tamani tamanut iserfigineqarsinnaasuni qanermut assiaquteqarneq.

Maanna illoqarfiit arlallit killilersuutinik maanna atuiffiusut tassaapput: Nuuk, Qasigiannguit aammalu Upernavik taakkunanilu nunaqarfiit aammalu Kangerlussuaq.

Coronapassimik takutitseqqusaanerup saniatigut inuit tamarmik qanermut assiaquteqaqqusaapput, soorlu (pisiniarfimmiikkunik, atuakkanik atorniartarfimmiikkunik, neriniartarfimmiikkunik assigisaanniluunniit) taamatuttaaq taxanut bussinulluunniit ilaagunik aamma qanermut assiaqut atussavaat.

Nutaartaasoq unaavoq, illoqarfinni tuniluunnerup pileqqaarfianik ilisimanniffiunngitsuni inuit tamat iserfigisinnaasaanni qatserisartut isersinnaasunut amerlassusiliinerisa affaannaat taamaallaat isersinnaatinneqalerput.

Sumiiffinnili arlalinni tunillatsissimasut amerliartorput - tassa Ittoqqortoormiini Qeqertarsuatsiaanilu, taamaammat sumiiffinni taakkunani marlunni killilersuutit amerlanerlernissaat ilimanarluinnarpoq.

Nunatta iluani allannermut malittarisassat allanngortut

Angalanerittaaq allannguuteqalaarput - nunattali iluinnaani.

Nunatsinnut angalaguit killilersuutit taamaaginnassapput. Nunattali iluani angalaniaruit, taakku allannguuteqarput:

• Tamakkiisumik kapitereersimasut, siusinnerusukkullu tunillanneqareersimasut (sap ak 12-t iluani) meeraaqqallu marluk ataallugit ukiullit nunatta iluani misissorteqqaanngikkaluarlutik qanorsuaq angalasinnaapput. 
• Marlunnik ukioqalereersimasut akiuussuserneqarsimanngitsut illoqarfimmit/nunaqarfimmiillu aallannginnerminni sumiiffigisaanni tunillatsissimasoqarsimanersoq apeqqutaatinnagu misissorteqqaassapput. 
• Aallarfissamiit misissortissinnaaneq ajornassappat, akiuussusertissimanngikkuillu taava tikiffinni mattusimaqqaassaatit aatsaallu Covid-19-mik tunillanneqarsimannginnerit uppernarsarsinnaanngorukku anisinnaanngussallutit. Tamanna misissortinnikkut ulluniluunniit 14-ini mattusimareerlutik ersiuteqanngikkuit aatsaat pisinnaavoq.
• Akiuussusertissimanallu tikiffigisanni illoqarfimmi / nunaqarfimmiluunniit misissortissinnaanngikkuit, taava ulluni 14-ini ersiuteqarnak mattusimassaatit.  
• Piumasaqaatilli atuutissanngillat nunatta avataanukarniarlutit illoqarfiit ilaannut akunnikkuit. Tassa soorlu Nuummiit Københavniliarniarlutit Kangerlussuarmut aqqusaassaguit.
• Qanermulli assiaqut pinngitsoorata tamatta atussavarput, aallalernermilu uppernarsaateqassalluta.

Malittarisassat jannuaarip tallimaanni unnuap qeqqaniit, ukioq manna apriilip tallimaata tungaanut atuutissapput.