CITES-mi kalaallit soqutigineqarnavianngitsut
Danmarkimi avatangiisinut ministerip Connie Hedegaardip Japanimiut arfanniartalernissaannut nunatta akuerseqqusinera tusaanagu Bangkokimi CITESi ataatsimeersualerpat danmarki taaseqataanianngilaq.
Taaseqataannginnissamik aalajangerneq Folketingimi partiit amerlanerussuteqartut kajumissaarinerannit pissuteqartoq avatangiisinut ministerip Connie Hedegaardip radioaviisimut oqaatigaa. Taasuma nunatta oqariartuutaa folketingip Europa pillugu ataatsimiititaliaanut apuussimagaluarpaa, ilaasortalli tamarmik kissaatiginngilaat Japanimiut akerineqassasut, nunarpullu illersorniarlugu taseqataassannginertik aalajangiutiinnarlugu.
Folketingimi ilaasortap IA-meersup Kuupik Kleist folketingimut suliassanngortitsinialernera tupiginninnerarpaa, ataatsimiititaliamili itigartitseqqusiut tassaanerarlugit siornatigut partiit naalakkeruisuutitaqarsimaasut SF-t danskfolkepartilu.
CITES pillugu ataatsimiinneq aqagu allartissaaq oktobarillu 14-niata tungaanut ingerlanneqassalluni.
Piniarnermut pisortaqarfimmi pisortap Amalie Jessenip oqaatigaa naalakkersuisut Danmarkip aalajangereernera pillugu naalakkersuisut ilisimatinneqareersut, sapaatillu akunnerata tulliani naalakkersuisut qisuariaateqarumaartut.
