Christiansborgimit qisuariaatit
Kalaallit politikeriisa nunaminni aaqqinniagassatik pillugit oqalliseriaasiat Danmarkimi politikerit tungaannit nersugaavoq.
- Danmarkimit malinnaaffigalugu qineqqusaarneq pitsaasumik ingerlasutut isikkoqarpoq, Kalaallit Nunaatami ajornartorsiutigisavii sammineqarmata. Tamanna pitsaasutut isigaara, politikerimmi ajornartorsiutinik tigussaasunik sammisaqarnissaat asulilu qujageqqusaaginnannginnissaat qinersisartut iluatsissinnaasimavaat, Finn Sørensen Enhedslistenimeersoq KNR-imut taama oqarpoq.
Naalakkersuisunngortitsinissamulli aamma ersarissumik kissaateqartorpoq:
- Uanga nammineerlunga, kalaalerpassuit immaqa aamma assingalugit, partiit anginersaasa marluusut suleqatigiilernissaat kissaatigaara. Taamaaliornikkummi Kalaallit Nunaata aningaasaqarniarnikkut ajornartorsiutigisaminut aaqqiissutissarsinissaminut patajaassuseq pisariaqartinneqartoq anguneqarsinnaammat.
AAMMA ATUARUK Danskit nunanut allanut ministeriata kalaallit pilluaqquai
Socialdemokraatillu Kalaallit Nunaannut tunngasunut oqaaseqartartuata Flemming Møller Mortensenip tamanna isumaqataaffigaa.
- Atituumik naalakkersuisooqatigiiliunngikkaluarluni atituumik naaperiuteqarluni isumaqatigiissuteqartoqarsinnaavoq. Ilaasortaatitalli amerlasuut tunuliaqutaralugit naalakkersuinikkut atituumik toqqammaveqarnikkut iluarsartuusseqqinniarnermi iliuuseriniakkat innuttaasunut nassuiaatiginissaat illersornissaallu pitsaanerusoraara.
Claus Hjort Frederiksenip Venstremeersup Kalaallit Nunaanni naalakkersuinerup qanoq iluseqartariaqarnera toqqaannartumik oqaaseqarfigerusunngikkaluarpaa. Naalakkersuisunngortussalli pillugit isumaa ersarippoq:
- Kalaallit Nunaanni naalakkersuinikkut pissutsit akuleruffigissanngilakka. Taamaaliornissannut tunngavissaqanngilluinnarpunga. Kalaallit Nunaannili aalajangiiffigisassat oqimaatsut eqqarsaatigalugit, Danmarkimi pisarnerput misilittagaqarfigisara eqqarsaatigissagukku, innuttaasut aalajangiinernut piareersarneqartariaqarput. Aamma taamatut aalajangiisoqarneratigut angusat pitsaasuusariaqarput. Taamaammat tamakku tamaasa eqqarsaatigalugit eqqortuusoraara sapinngisamik atitunerpaamik naalakkersuisooqatigiinnik pilersitsisoqarnissaa.
Dansk Folkepartiimit aamma tamanna qularutigineqanngilaq. Siumup IA-llu suleqatigiinnissaat aqqutissatuaavoq, partiip Kalaallit Nunaannut tunngasunut oqaaseqartartua, Søren Espersen, KNR-imut taama oqarpoq.
- Kalaallit Nunaanni aningaasaqarniarnikkut ajorluinnartumut maanna ingerlaarput, taamatullu inissisimasoqartillugu suleqatigiittoqarsinnaanngippat, tamanna aningaasaqarniarnermut tunngatillugu akisussaassuseqanngilluinnarnertut isigisariaqarpoq.
