Cataloniap siuttuata Spania isumaqatiginninniarfigerusukkaa

Spaniami naalakkersuisut Cataloniamut tunngatillugu politikkiat pitsaavallaarsimanngilaq. Cataloniap præsidentia Carles Puigdemont ippassaq unnukkut oqalugiarami taama ilaatigut oqarpoq.
Cataloniamiut siuttuat, Carles Puigdemont Assi © : Ariet/Flickr Creative Commons
Allattoq Ritzau
oktobarip 05-at 2017 07:29
Nutserisoq Mads Lynge

Puigdemontip oqalugiarnissaa pissanngatigineqarsimaqaaq, Spaniamilu naalakkersuisut oqaloqatigilluarlugillu isumaqatiginninniarfigineqarsinnaanissaat taassuma neriuutigaa.

- Isumaginninniartitsisussamik pisariaqartitsivugut. Neqeroorutit assigiinngitsut akunnerni kingullerni tiguavut, allanillu aamma tigusaqarumaarpugut. Isumaqatiginninniarnissanut piareersimanera inuit nalunngilaat, Puigdemont oqarpoq.

Cataloniamiut oqaloqatigineqalernissaat Spaniami naalakkersuisut akuerinngilaat. Tuluit nutaarsiassaqartitsiviat Reuters taama allaaserisaqarpoq.

Cataloniap Spaniamit avissaarluni namminiilivittunngornissaa Spaniap tunngaviusumik inatsisaanik unioqqutitsinerusoq Spaniami naalakkersuisut attappaat.

- Puigdemont oqaloqateqarniaruni, isumaqatiginninniaruni isumaqatiginninniartussanilluunniit aallartitaqassaguni nalunngilluinnarpaa qanoq ilioqqaassanerluni: Inatsisinik unioqqutitsiunnaartariaqasssaaq, Spaniami naalakkersuisut ilaatigut taama allapput.

Cataloniami naalakkersuisut Catalonia namminiliivittunngortutut ataasinngorpat suaarutiginiaraat ippassaq pingasunngornermi nalunaarutigineqarpoq.

/Ritzau/