Cataloniap namminersortuunera atuukkunnaarsinniaraat
Spaniami Naalakkersuisut Cataloniap namminersortuunera atuukkunnaarsinniarpaat.
Atuukkunnaarsitsinissamillu maanna suliniuteqartut, Spaniami ministeriuneq Mariano Rajoy tusagassiortunik arfininngornermi katersortitsinermi oqarpoq.
Cataloniap Spaniamiit avissaarnissaa pillugu taasititsineq politikikkut aaqqiiagiinnginnermik kinguneqarpoq.
Spaniap tunngaviusumik inatsisaani immikkoortup 155-ip atuutilersinneqarnissaanut, tassa Cataloniap namminersornerata atuukkunnaarsinneqarnissaanut, atatillugu isumaqatigiissusiortoqarpoq.
Rajoyillu Cataloniami qaammatit arfinillit ingerlaneranni taasisoqarnissaa kissaatigaa.
Cataloniap naalakkersuinikkut aqutsisua Carles Puigdemont arfininngornermi unnukkut, Spaniap nalunaaqutaa malillugu, qulingiluanut oqalugiassasoq, nutaarsiassaqartitsivik AFP allappoq.
/ritzau/AP