Canadap immikkoortuani Northwest Territoriesimi qinersineq naammassivoq
Nunammi immikkoortuani tassani naalakkersuisunngortussat tamanna aalajangertussaassavaat.
Qineqqusaarneq sakkortusimaqaaq, Northwest Territoriesimi aningaasaqarniarneq ukiuni makkunani unittooqqavoq. Aatsitassanummi akit appasereersut suli appariaqqinnikuunerat tassunga pissutaaqataapput.
Nunamillu piginnittussaanermut tunngasut pillugit isumaqatiginninniarnerit suli aamma naammassineqarsimanngillat.
Nunallu immikkoortuani tassani attaveqaatitigut nunallu atortulersugaanerata pitsaanerulersinneqarnissaat tamaani innuttaasut aamma piumasaraat, assersuutigalugu kuussuup Mackenziep qooruani ukioq naallugu atorneqarsinnaasumik aqqusinniortoqarnissaa piumasarineqarpoq, Northwest Territoriesip aningasarsiorneranut tamanna pingaaruteqarnera matumani pissutaatinneqarpoq. Taamatulli aqqusinniornissaq akisoqaaq.
Northwest Territoriesip avannarpasinnerusortaa Inuvialuinnit annerusumik innuttaqarpoq.