Canadamiut qullartaasiat motoorillit atorlugit issittumi assartuussisalerniartut
Suliffeqarfik pineqartoq tassaavoq LTA Aerostructures, taannalu qullartaasianik motoorilinnik issittup pigisaanut nioqqutissanik sanaartornermilu atortussianik assartuisinnaasunik sanaartorniarpoq.
Suliffeqarfiup siulittaasuata Marc Bourretip tusagassiorfimmut APTN NEWS-imut oqaatigaa, qullartaasiat motoorillit issittumi assartuussinermi siunissami atugaallualersinnaasut.
Isumassarsiarli nutaajunngilaq. Tyskermi officeri Ferdinand von Zeppelin qullartaasianik motoorilinnik 1870-imi ineriartortitsivoq, ukiorlu 1900 Zeppelineri qullartaasiaq motoorilik siulleq qatanngarpoq, timmisartulli nutaaliat atugaanerulermata qullartaasiat sanaartorneqarunnaarput.
Nukissiuutit mingutsitsinngitsut atorniarpaat
LTA Aerostructuresip tamanna allanngortinnialerpaa, qullartaasiamimmi motoorilimmik allaanerusumik sananiarpoq, qangatut ikuallattoornissamut navianarpallaanngitsumik.
Qullartaasiassammi nukissiuutinik mingutsitsinngitsunik atuissapput, timmisartunillu nalinginnaasunit orsussamik atuinikinnerullutik. Qullartaasiat pitsaaqutigilluagaasa ilagaat sumulluunniit missinnaanerat. Aamma assartusagassanik sanaartornermilu atortussianik amerlasoorsuarnik useqarsinnaapput.
Marc Bourretip aamma oqaatigaa qullartaasiat motoorillit sanaartornermi atortussianik, allaallumi illunik katitigassanik ilivitsunik, nunaqarfimmi sanaartorfissamut toqqaannaq assartuisinnaassasut.
Natan Obedip, Inuit Tapiriit Kanatami siulittaasup, oqaatigaa naggueqatigiit Inuit isumassarsianut nutaaliorfiusunut ammajuaannartuusut.
Qullartaasiamik siullersaata 2018-imi angallassilersinnaanissaa suliffeqarfiup neriuutigaa.