Canadami qinersisoqartussanngorpoq
USA-mimi sivisoorujussuarmik qineqqusaartoqartarneranut naleqqiullugu, Canadami qineqqusaartoqartarnera sivikinnerungaatsiartarpoq sapaatit-akunnerinik tallimanik arfinilinnilluunniit sivisussuseqartarluni.
Qineqqusaarnerli tamatumuuna ullunik 78-inik sivisussuseqassaaq, Canadap oqaluttuarisaanerani nutaajunerusumi qineqqusaarnerit sivisunersarissallugu.
Qinersinerup ullua tassaassaaq oktobarip 19-iat.
Aamma atuaruk Canadami ministeriunerup qinersineq suaarutigaa pissaanerlu nammineq tiguniarlugu
Canadami partiit anginerit sisamaapput. Konservativet partiiat Stephen Harper siuttoralugu ukiuni kingullerni amerlanerussuteqarluni naalakkersuisuutitaqartarpoq. Naalakkersuisut nuannarineqarpallaanngillat, sivisuumilli qineqqusaartoqarnissaa iluaqutigisinnaassallugu neriuutigaat Canadamiunillu kingumut siuttunngorteqqinneqarusullutik.
Nunap inoqqaavi qinersiartornissamut kajumissaarneqarput
Nutaatullu partiinit allanit illuatungilerneqaannaratik aamma nunap inoqqaavinit illuatungilerniarneqassapput, taakku nuna tamakkerlugu høvdingimit qinersiartornissamik kajumissaarneqarmata.
Nunap inoqqaavi amerlasoorpassuit qinersiartorneq-ajorput, ilaallu nuna tamakkerlugu naalakkersuisut akuerinnginnamikkit taamaaliorneq-ajorput. Tamatumuunali qinersissappata tamannalu qinersivinni 51-iusuni allanngortitsisinnaavoq, qinikkat agguataarnerannut angisuumik sunniuteqarluni maannalu naalakkersuisuusunut akornutaasinnaassalluni.
Inuit, indianerit metisillu naalakkersuisut konservativenit siuttuuffigineqartut isornartorsiorpaat, ilaatigut piumasaqaatiminnut kissaatiminnullu tunngatillugu qaangiinnarneqartarnertik pissutigalugu.
Nunalli inoqqaavi Canadami qinersinerup inerneranut angisuumik sunniuteqarnissaminnut tamatumuuna periarfissaqarput.
