Canadami nunap inoqqaavi mininneqarsimasutut misigipput

Canadami Inuttut Pisinnaatitaaffiit pillugit Katersugaasivissuaq, the National Museum for Human Rights, sapaatip-akunnerata massuma naanerani ammarneqarpoq. Katersugaasivik taanna inuttut pisinnaatitaaffinnut tunngasunut nunarsuarmi kisiartaalluni katersugaasiviuvoq.

Katersugaasivik ukiut qulit sinnerlugit utaqqineqarsimavoq, 2 milliardit koruuninillu akeqarnikuulluni. Nunap immikkoortuata Manitobap illoqarfiisa pingaarnersaanni Winnipegimi inissisimavoq.

Katersugaasivik ippassaq ammarneqarmat, Canadami nunap inoqqaavi akerliussutsiminnik takutitsipput. Inuttummi pisinnaatitaaffiit assigiinngitsut tallimat katersugaasivimmi immikkut saqqummersinneqarnerannut atatillugu mininneqarsimasutut misigipput. Tassami inuiannik toqoraasimanerit tallimat Canadami naalakkersuisut nassuerutigisimasaat matumani pineqarput, assersuutigalugu juutinik sorsunnersuup kingulliup nalaani toqoraanerit, Rwandamilu 1994-imi toqoraanerit.

Canadami nunap inoqqaavi pillugit katersugaasivimmi annertunerusumik saqqummersitsisoqanngilaq. Canadami nunap inoqqaavisa pisinnaatitaaffiinik siornatigut unioqqutitsisimanerit immikkut sammineqanngillat, soorlu meeqqat atuarfinni nerisaqarfiullutillu ineqarfiusuni ukiut 100-t sinneerlugit atornerlugaasimasut.

Canadami nunap inoqqaavi inuttut pisinnaatitaaffiiagaasimasimanngitsut, katersugaasiviup attappaa, soorlu Canadami naalakkersuisut aamma taama isumaqartut. Taama isumaqartoqarpoq, naak nunap inoqqaavi akerlianik isumaqaraluartut.

Nunap inoqqaavisa arnartaat piffissap ingerlanerani periarfeerunneqarsimallutillu toqutaasimasut, Canadami naalakkersuisut misissuiffiginianngilaat, akerliussutsiminnillu takutitsisut tamanna assuaraat.