Canadami naalungiarsuit marluk ikuallagussaasut
Canadami Indianerinut nunagitinneqartuni ilaanni atugassarititaasut assuarlerneqartarnerat akuttunngitsumik pisarpoq, qanittukkullu pisariaqanngitsumik marlunnik toqusoqareersorlu oqallinneq sakkortusineqarpoq.
Indianerinut nunagititami Makwa Shgaiehcanimi namminneq qatserisartoqanngillat, ikuallattoqaraangallu illoqarfimmiit eqqaaniittumit Loon Lakemiit qatserisartut aggertarput. Marlunngormallu unnuaani ikuallattoqarpoq.
Nunagitinneqartumiillu qatserisartunut 15.000 koruuninik akiligassaqarmata ikuallattumut ikiuiartortoqanngilaq.
Siarnguttoqarpoq. Qatserisartulli pisortaat oqarasuaammik tigummiartoq akisarsimavoq "naamik aggersinnaanngilagut, qaammatip siulianut akiligassarsi suli akilerneqannginnassiuk". Taamatut oqariarluni ilisarpaa innaqqillunilu.
Naalungiarsuit marluk, aappaa marlunnik ukiulik aappaalu 18-nik qaammatilik, alianaqisumik ikuallannermi ajunaarput.