Canadami marihuanap ammaanneqarnissaanut piareersartut
Marihuanalli pisiarinera, tuniniarnera naatinneqarneralu nunap immikkoortuini territorianilu nammineq malittarisassiuunneqassaaq.
Tamannalu qaammatini aggersuni oqallinnernik arlalissuarnik pilersitsisussanngorpoq.
Inuvialuit nunaanni Nordvestterritoriap kippasinnerusuaniittumi innuttaasut ataatsimeeqatigineqarput. Aammattaaq qarasaasiakkut immersugassamik nassiussuisoqarsimavoq, immersuisullu amerlasuupilussuusimapput.
AAMMA ATUARUK Canadami Cannabis ammaanneqarniartoq
Nunavumi najukkami innuttaasut isumaannik misissuinerit saniatigut aamma innuttaasut paasiniaavigalugit ataatsimiititsinerit arlallit ukiup ingerlanerani pisimapput.
Nunavumi inatsisartut marihuanamik atuinermut politikkiliornissaq siunertaralugu paasiniaalluni ataatsimiititsinernit misissuinernillu paasissutissat katersorneqartut ukiumi nutaami misissorlugit aallartissavaat.
Atuisuussagaanni qassinik ukioqarnissaq, akit qanoq aalajangersorneqarnissaat marihuanallu sumi tuniniarneqarsinnaanissaa ilaatigut aalajangiiffigineqassapput.