Canadami isumalioqatigiissitaq nalunaarusianik saqqummersitsisoq

Canadami Ilumoortussaq Saammaateqatigiinnissarlu pillugit Isumalioqatigiissitap nalunaarusiai sivisuumik utaqqineqarsimasut ullumi saqqummersinneqarput.
Assi © : Alec Couros/Flickr Creative Commons
decembarip 15-at 2015 07:29
Nutserisoq Simon Uldum -

Nunap inoqqaavinut kostskolini ajorluinnartunik pisarsimasunut takunnittuusimasunit paasissutissanik katersilluni Canadami Ilumoortussaq Saammaateqatigiinnissarlu pillugit Isumalioqatigiissitaq Canadami ukiuni arfinilinni angalasimavoq. Quarsaarnartorpassuit paasineqarput, taakkulu tamaasa allattorneqarput qaqugumut puigorneqartussaajunnaarsillugit.

Nalunaarusiami, atuakkani immikkoortuni arfinilinni saqqummersinneqartussami, kostskolini ajortunik pisarsimasut ajunngitsullu amerlagisassaanngitsut allaaserineqarput.

Aamma atuaruk Terry Audla nalunaarusiaq pillugu: Neriorsuutit siunissami eqquutsinneqartassapput

Naggueqatigiit Inuit misigisarsimasaat indianerinut naleqqiullugit allaanerulaarput. Taakkununngami kostskolit ikinnerusimapput aatsaallu 1950-ikkunni Canadap issittuani kostskolinik pilersitsiortortoqarluni.

Aappaatigulli tamatuma sunniutaa sakkortunerusimavoq, Canadammi issittuani najugaqartut amerlanersaat taassaammata Inuit.

Isumalioqatigiissitami siulittaasoq, eqqartuussisoq Murray Sinclair, nutaarsiassaqartitsivimmut CBC Newsimut oqarpoq naggueqatigiit "nammatassaanngiusartumik kingornussaqarsimasut" kinguaariinnit kinguaariinnut sunniuteqartunik, taakkulu tarnikkut ajornartorsiutinik, imigassamik atornerluinermik, imminut toquttarnermik, nakuusernermik pinerluttuliornermillu kinguneqarsimasut.

Murray Sinclair aamma oqaluttuarpoq meeqqat 3200-t toqusimanerannut isumalioqatigiissitaq uppernarsaatissaqartoq, ilanngullugulu oqaatigaa isumalioqatigiissitap atuarfiit tamakkerlugit misissuiffigisimanngikkai nalunaarsukkallu amigartarsimasut. Taamaammat ilimagilluinnarpaa meeqqat napparsimallutik, sumiginnagaallutik naammattunillu nerisaqartinneqannginnertik pissutigalugu toqusimasut amerlanerujussuusinnaasut, allaat quleriaataanik amerlanerusinnaasut.

Nalunaarusiap immikkoortuata aappaani naggueqatigiit inuit kostskolini misigisarsimasaat allaaserineqarput.

Aamma atuaruk Canadami Saammaateqatigiinnissaq pillugu Isumalioqatigiissitap sulinera naammassilersoq