Canadami Inuit peqqissusaat pillugu nalunaarusiaq saqqimmerpoq

Nalunaarusiaq qulequtserneqarpoq: Inuit peqqissusaannut inuuniarnikkut atukkat qanoq pingaaruteqartigineri. Tassani allaaserineqarluni, Inuit peqqissusaasa, Canadamiunut allanut naleqqiullugu unammillernartut qanoq annertugineri.

Nalunaarusiami paasissutissiissutigineqarpoq, Inuit Canadamiunut allanut naleqqiullutik sivikinnermik inuusartut allaat ukiut qulit angullugit sivikinnermik inuusarlutik. Taamatullu meeraaqqat toqusartut amerlanerujussuusut aamma allaaserineqarluni. Minnerunngitsumillu allaaserineqarpoq, Inuit imminortartut nunaqqatiminnut allanut naleqqiullutik amerlanerujussuusut.

Tamakku paasisat aallaavigalugit suliniarnissaq ilorraap tungaanut aallartinneqarsinnaasoq, Inuit Tapiriit Kanadamip siulittaasuata, Terry Audlap neriuutigaa.

- Inuit ulluinnarni atugaat peqqissutsillu qanoq ittuuneri ataqatigiissut nalunaarusiami allaaserineqarpoq. Tamannalu allaanngortinneqassappat suleriaatsinik nutaanik aallartitsisoqartariaqarpoq taamaalilluta Inuit inuunerisa oqinnerulerulerlutillu pitsanngortinneqarnissaat anguneqartussaassammat, Terry Audla oqarpoq.

Taassuma taama oqarnera, Nunavummi Peqqinnissaqarfiup pisortaata, Maureen Baikie-p isumaqatigilluinnarpaa.

- Ataatsimut siunnerfilimmik aallaaveqarluta sulisariaqarpugut, Maureen Baikie oqarpoq inuillu ulluinnarni atugaasa qanorlu najugaqariaaseqarnerisa taakku peqqissusaat sunnerneqarsimasoq oqaatigalugu.

Nalunaarusiaq atuarniaraanni, Inuit Tapiriit Kanadamip nittartagaanni: www.itk.ca -mi nassaarineqarsinnaavoq.