Nunanit allanit

Canadami arnat toqunneqartartut tammaaneqartartullu pillugit illuatungiliuttut akiuinialerput

Canadami inatsisartut juullimi sulinngiffeqarnissaat sioqqutsitsiarlugu partii illuatungiliuttuneersoq, The New Democratic Party, ministeriunermik Stephen Harperimik taassumalu naalakkersuisuinik konservativiusunik sakkortuumik isornartorsiuivoq.
Allattoq Marianne Stenbæk, Montreal, Canada
decembarip 30-at 2014 13:54
Nutserisoq Elisa Isaksen

Naggueqatigiit Inuit, Metisit indianerillu arnartaat tammaaneqartartut toqunneqartartullu ministeriunerup miserratigalugillu iliuuseqarfigerusunngikkai, illuatungiliuttuni politikerit arlallit, ministeriunermik saassussinerminni oqaatigaat.

 

2014-ip ingerlanerani illuatungiliuttut inatsisartuni partiit allat assigalugit soorlu aamma suliniaqatigiit nunap inoqqaavisa arnartaanneersut, naggueqatigiit Inuit aamma indianerit suliniaqatigiinneersut aamma nunap immikkoortuini naalakkersuisut siuttuisa amerlanersaasa, ministeriuneq nuna tamakkerlugu tusarniaanermik aallartitseqqullugu qinnuigisaraluarpaat, arnarpassuit sooq tammaaneqartarnersut qanorlu toqunneqartarnersut paasisaqarfigineqarniassammata.

 

Ministeriunerli tamatigut itigartitsisarpoq.

 

Ministeriuneq aamma nunap inoqqaavisa ilinniagaqarnissaannik inuunerminnilu atugaannik pingaartitsinnginnerarlugu illuatungiliuttunit aamma saassutarineqarpoq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq