Canada pisinnaatitaaffinnik unioqqutitsisutut isornartorsiorneqarpoq

Naalagaaffiit Peqatigiinni Human Rights Committee, tassalu inuttut pisinnaatitaaffiit pillugit ataatsimiititaliaq, sapaatit-akunneranni uani nalunaarusiamik saqqummiussaqarpoq Canada inuttut pisinnaatitaaffinnik arlalitsigut unioqqutitsisutut sakkortuumik isornartorsiorneqarluni.

Naalagaaffiit Peqatigiit isornartorsiugaat pingaarnerit marluupput.

Siulleq tassaavoq inatsit nutaaq, Inatsit C-51-mik taaguuteqartoq ukiarlu akuersissutigineqartoq, peqqarniisaarnianillu akiuiniarnermut tunngasoq.

Canadamili nunap inuii arlallit, pingaartumik indianerit, isumaqarput inatsit taanna imminnut naalagaaffimmullu akerliuniartarnerminnut aamma atorneqarsinnaasoq.

Nunap inuiisa arnartaasa periarfeerussat pillugit tusarniaarusunngillat

Naalagaaffiit Peqatigiit isornartorsiugaasa aappaat tassaavoq Canadap nunap inuiisa arnartaannut qanoq iliuuseqartarnera.

Naggueqatigiit inuit, metisit indianerillu arnartaasa periarfeerunneqartartut imaluunniit inuartarineqartartut pillugit nuna tamakkerlugu tusarniaanissamik Canadami naalakkersuisut itigartitsisimanerat nalunaarusiami isornartorsiorneqarpoq.

Arnat periarfeerunneqarsimasut amerlassusaat assigiinngiiarpoq - 1200-nit tuusintinut arlalinnut.

Canadami nunap immikkoortuini naalakkersuisut siuttui qulit nunap inuiisalu suliniaqatigiiffii tamarmik Canadami naalakkersuisut taama ittumik tusarniaaqqullugit arlaleriarlutik qinnuigisimagaluarpaat.

Naalakkersuisulli maannamut taamaaliorumanngillat. Naalagaaffiillu Peqatigiit isornartorsiuinerisigut naalakkersuisut allatut isummerumaarnersut maanna apeqqutaalerpoq.

Nunap inuiisa arnartaasa nakuuserfigineqartarnerat Naalagaaffiit Peqatigiinnit aamma nalinginnaasumik isornartorsiorneqarpoq.