ASSIT Campusimeersut Aaja Chemnitz Larsen Folketingimut pulaaraat
Ilinniartut 60-it ilinniartitsisullu sisamat Qaqortumi Campus Kujallermeersut IA sinnerlugu Folketingimut ilaasortaq Aaja Chemnitz Larsen Christiansborgimi tallimanngormat pulaarpaat.
Allattoq Kenneth Elkjær
aggustip 12-at 2016 10:34
Inuit Ataqatigiit Folketingimi ilaasortaatitaat Aaja Chemnitz Larsen atuartut tikilluaqquai folketingimilu sulineq oqaluttuaralugu. Atuartut aamma Christiansborg-imi takornariartinneqarput, Aajalu ulluinnarni qanoq Kalaallit Nunaat sinnerlugu sulisarnerluni qanorlu Kalaallit Nunaannut iluaqutaanersoq oqaluttuarivaa.
- Nuannaarutigeqaara Campus Kujallermi atuartut ullumi Folketingimi pulaarnissaminnut piffissaqarsimammata. Atuartut Kalaallit Nunaanneersut pulaartarnerat assut pingaartittarparput. Isumaqarpunga pingaaruteqartoq atuartut qanoq demokrati ulluinnarni Folketingimi ingerlasarnersoq paasisaqarfigissagaat, Aaja Chemnitz Larsen atuartut pulaarnerat pillugu tusagassiorfinnut nalunaaruteqarluni taama allappoq.
Atuartut 60-it 3.G-nngoqqammerput klassillu sisamaninngaanneerlutik. Atuartut Barcelonami paasisassarsiorlutik angalasimapput massakkullu Københavnimiillutik.
