Nunanut allanut ministeri Camp Centurymut akisussaasut suli inissinneqanngillat
Naak danskit nunanut allanut tunngasunut ministeriat Kristian Jensen sakkutooqarfiusimasoq Camp Century pillugu nunanut allanut tunngasunut Naalakkersuisumik Vittus Qujaukitsumik sisamanngornermi ataatsimeeqateqareeraluartoq.
Ataatsimeeqatigiinnissaat sioqqullugu paasinarsivoq, suliap suliarineqarnerani danskit isornartorsiorlugit Vittus Qujaukitsoq allagaqarsimasoq.
Tamannali angusaqarfiunngilaq, tassami danskit nunanut allanut tunngasunut ministerita Kristian Jensenip suli akissutissaqartinngilaa, kina imaluunniit kikkut sakkutooqarfiusimasumik Camp Centyrimik akisussaasuunersut.
- Kikkut akisussaasuunersut aamma qanoq akeqassanersoq ullumikkut oqaaseqarfigisinnaanngilara, Kristian Jensen taama oqarpoq.
Aamma atuaruk Pituffimmik ilungersuuteqarneq iluatsinngilaq
Taassumalu uteqqullugu erseqqissaatigaa, sakkutooqarfiusimasumi Camp Centurymi pissutsit pillugit misissuinissamut Danmark piffissaqarneruniarmat aamma kikkut akisussaasuunersut paasiniarneqassammat.
Nunanut allanut tunngasunut naalakkersuisup Vittus Qujaukitsup tusagassiortunik sisamanngornermi katersortitsinermi erseqqissaatigaa, misissuisitsinerit pingaaruteqartut misissuinermilu paasineqartut Kalaallit Nunaannit atorfissaqartinneqarmata.
Aamma atuaruk Camp Century Naalagaaffiit Peqatigiinnut suliassanngortinniarlugu nunatta sioorasaarutigigaa
- Pingaarnersaasoq uaniippoq, mingutsitsinerup sunniutai qanoq avatangiisinut, pinngortitamut, inunnut uumasunullu qanoq navianartiginersut ilisimassallugit
Nunanut allanut tunngasunut naalakkersuisoq Vittus Qujaukitsoq taama oqarpoq.