Assi: U.S. Army

Camp Century Naalagaaffiit Peqatigiinnut suliassanngortinniarlugu nunatta sioorasaarutigigaa

Avannaani sakkutooqarfiusimasumi Camp Centurymi avatangiisinik saliinissamik Namminersorlutik Oqartussat kissaatigisaat Danmarkimit malinneqanngippata, tamanna Naalagaaffiit Peqatigiinnut suliassanngortinniarlugu nunatta sioorasaarutigaa.

Danskit aviisiat Politiken, nunanut allanut tunngasunut naalakkersuisup Vittus Qujaukitsup danskit nunanut tunngasunut allanut ministeriannut Kristian Jensenimut allagaanik takunnissimasoq taama allaaserisaqarpoq.

Allakkani ima allassimasoqarpoq:

“Kissaatigisatta danskit tungaannit malinneqarnissaannut piumassuteqartoqanngippat, Kalaallit Nunaata matumani pineqartoq nunani tamalaani suleqatigiiffinnut attuumassuteqartunut saaffiginnissutigisariaqassavaa."

Politiken naapertorlugu, Vittus Qujaukitsup Naalagaaffiit Peqatigiit isumaqatigiissutaat marluk aamma nunap inoqqaavisa pisinnaatitaaffii pillugit nalunaarutit allakkamini innersuussutigai.

Danskit avatangiisinut ministeriata siornatigut nalunaarutigereerpaa amerikamiut sakkutooqarfigisimasaanni mingutsitsinerup annertussusianik misissuisoqassasoq.

Paasissutissat

Geophysical Research Letters naapertorlugu sakkutooqarfiusimasoq silap pissusiata allanngoriartornera pissutigalugu sermimit ukiumit 2090-imiit saqqumilersinnaavoq.

 

Uulia ikummatissaq 200.000 literi, imikoq 24 millionit liiteri kiisalu toqunartoq PCB annertooq eqqakkallu qinngornernik ulorianartunik akullit qaqugumorsuarmut sermersuup ataaniitinnissaannik isumassarsiarineqarsimasoq eqquutinngitsoortussanngorpoq.

Aamma atuaruk Qujaukitsup danskit isornartorsiorpai

Danskilli nunanut allanut tunngasunut ministeriata avatangiisinullu ministeriata tamanna qaqugu pissanersoq avatangiisinillu saliineq kimit isumagineqassanersoq oqaatiginngilaat. Tamanna USA-mut isumaqatigiissutaasut najoqqutaralugit erseqqissaqqaarneqassasoq nunanut allanut tunngasunut ministerip Kristian Jensenip erseqqissaatigaa.

Aamma atuaruk Oqaaseqartartut: Kalaallit Nunaat Camp Centurymut akisussaaqataanngilaq

Aamma atuaruk Immikkut ilisimasalik: Camp Centurymi saliinissamik isumaqatigiissusiortoqarsimanngilaq

Vittus Qujaukitsup aamma danskit nunanut allanut ministereqarfiata suliaq oqaaseqarfigeqqikkusunngilaat. Nunanulli allanut tunngasunut ministeri Kristian Jensen nunatsinnut ukiumoortumik tikeraarluni ullumikkut tikissaaq Vittus Qujaukitsorlu peqatigalugu tusagassiortunik ualimut katersortitsissalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!