Breivikip parnaarusimaneqarnermi atugai aalajangiiffigineqartussanngortut
Norgemi parnaarussiviit ilaannit immikkut isumannaallisakkamit Skienimiittumit nutaarsiassaq Norgemi tusagassiuutinit sammineqaqqilerpoq, inorersummi Anders Behring Breivikip parnaarusimaneqarnerani pissutsit pillugit eqqartuussineq nanginneqartussanngorpoq.
Allattoq Ritzau
januaarip 10-at 2017 15:42
Nutserisoq Mads Lynge
Breivikip parnaarusimaneqarnermi atugai eqqartuussivimmi aalajangiiffigineqartussanngorpoq. Naalagaaffiummi Breivikimut iliuuserisai inuppalaanngitsutut nikassaarpasittutullu Oslop Eqqartuussivianit siorna marsimi aalajangiiffigineqarnerata suliassanngorteqqinneqarnera, Norgep Eqqartuussiviani suliarineqartussanngorpoq.
Parnaarussivimmi sulisut isumannaallisaaniarnermut tunngasunik ima aallutaqartigisimapput Breivikip inuttut pisinnaatitaaffii puigorlugit. Oslop eqqartuussivia siorna taama aalajangiivoq.
Naalagaaffilli aalajangiinermut isumaqataanngilaq, aalajangiinerlu suliareqqitassanngortillugu.
Oslop eqqartuussiviata aalajangiinerata suliareqqitassanngortinneqarneranut ullut arfinillit immikkoortinneqarsimapput.
