VIDEO Brasiliamiut timmisartuata nakkarfia
Timmisartup Brasiliameersup Columbiami marlunngormat nakkarfiani suli ulapputtoqarpoq.
Brasiliamiut arsaattartut Chapecoensemeersut sulisuisalu ilarpassui timmisartumut ilaanerat pissutigalugu timmisartup nakkarnera sammineqartupilussuuvoq.
Ilaasut 71-it ajunaarsimanerat maannamut uppernarsarneqarpoq annattullu arfiniliupput.
Annaassiniartut pisortaat Carlos Ivan Marquez Perez timmisartup nakkarfianit ima oqaluttuarpoq:
- Inuit arsaakkiarlutik nunamut allamut angalasut timaannik ujaasinerput paasiuminaappoq oqimaaqalunilu.
- Ajunaartulli timaat ilaqutaannut utertissinnaaneri, taamaalillutillu ilineqarsinnaalernissaat qimagaasullu eqqissiallannissaat nuannaarutigaarput, Carlos Ivan Marquez Perez oqarpoq.
Boksit qernertut timmisartumit tiguneqareersimapput, timmisartullu nakkarneranut suna pissutaanersoq maanna paasiniarneqaleruttorluni. Timmisartup orsuerussimanissaa maannamut ilimagineqarpoq.
