Bornholmimi puisinut akeqqersimaartut
Aalisartut puisinik nuannarisaqanngeqimmata, aalisartoq Bornholmimeersoq pisisartuminut puisip amiinik atisaqartunut, puisilluunniit amiinik aningaasivilinnut 10 procentimik akikilliliisalerpoq.
10 procentinik akikilliliineq taanna, pisisartut puisinik ikilisaaqataasimanerannut qujassutitut tunniussaraa.
Puisit piniaqqusaannginnerisa kinguneraa Bornholmip eqqaanittut ukiuni kingullerni amerlerujussuarsimammata, qassutiniillu pisat nerisarmatigit.
Ilungersunarnerpaavorlu, puisit saarulliit uumasuaqqanik miluuttunik, aalisakkat millissutigisartagaannik illinnarunnaassutigisartagaannillu tunillaattarmatigit. Imaani uumasut nappaataannik ukiorpassuarni suliaqarsimasoq, imaani uumassusillit pillugit professori Kurt Buchmann taama oqaluttuarpoq.
Saarullinni uumasuaqqat miluuttut amerliartornerat, pingaartumik Østersømi puisit amerlerujussuarneranut attuumassuteqartoq, Kurt Buchmann oqarpoq.
Tassalu aalisartup Claus Stenmann Hansenip Svanekemeersup puisit kamaatingaaramigit pisisartuminut puisip amiinik atisaqartunut, puisilluunniit amiinik aningaasivilinnut,10 procentimik akikilliliisalerpoq.
Aammattaaq danskit avatangiisinut inuussutissanullu tunngasunut ministeriat isumaqarpoq, Danmarkimi puisit amerliartornerat iliuuseqarfigineqartariaqartoq, Svenskillu ministeriat tamatuminnga aaqqiiniarnissaq pillugu attaviginiarlugu.Tassami puisit Sverigemi piaqqisarput:
- Imaassinnaavormi puisit amerlanerusut aallaaneqartarnissaat ataatsimut isumagisinnaagipput. Sverigemi suleqatiga tamatuminnga oqaloqatigiumaarpara, Danmarkip Radioanut oqarpoq.
