Borgmesterip aningaasaqarnikkut unammillikkat qaangiigaluarluni anigorniarai

Kommune Kujallermi aningaasaqarneq unammillernartoqarpoq, borgmesterilli tamanna aappaagumut missingersuutit nakkutigisinnaallugit neriorsuutigaa.
Assi © : Kommune Kujalleq
Allattoq Kenneth Elkjær
novembarip 07-at 2017 14:28

Kommune Kujalleq 2017-imi aningaasaqarnikkut unammilligassaqalaarpoq. Meeqqanut inuusuttunullu aningaasartuutit qaffapiloorput, suliffissaaleqisunuttaaq aningaasartuutit aamma qaffallutik.

Tamannali borgmesterip, Kiista P. Isaksenip unnuami sinnarluutigineq ajorpaa.

Borgmesteri tusagassiorfiit arlaqartut kommunip aningaasaqarneranik takunnissinnaanermik noqqaassuteqareerneratigut tusagassiutinut taama nalunaaruteqarpoq.

Kommune Kujalliup meeqqat inuusuttullu ulloq unnuarlu angerlarsimaffiannut missingersuutai 65 procentimik tassa 13 millionit koruuninik qaangiinissaq naatsorsuutigalugu tusagassiutinut nalunaarummi allappaa.

- Ukiup qaammataani kingullermi ulloq unnuarlu angerlarsimaffinnut inissiisariaqarnerit ikileriaateqassasut naatsorsuutiinnginnatsigu, pissutsit qanoq innerat najoqqutaralugu qisuariarpugut, taamaalillutalu aningaasatigut ingerlatsinerput unammilligassamut naleqqussarniarsimallutigu, borgmester tusagassiutinut allappoq.

Sipaarniarneq innuttaasunut eqquissanngitsoq

Kommunip sumi sipaarniarnissaq sammingaatsiarsimagaa borgmesterip allappaa, sipaarniarnerillu innuttaasunut kiffartuussinermut sunniuteqassanngilaq.

Meeqqat inuusuttullu angerlarsimaffiup avataanut inissinneqartarnerat kisimi kommunip aningaasaqarneranut unammillertitsinngilaq.

Kujalleq aalisakkanik tunisaqarsinnaanermik ukioq manna ajornartorsiuteqangaatsiarpoq. Kujataani tunisineq 2016-imut sanilliullugu kinguariaateqangaatsiartoq, KNR-imit septembarip qaammataani allaaseraarput.

AAMMA ATUARUK Kujataani tunisat ikileriarujussuartut

Tunisat amigaataaneri akeqartut

Qaqortumi tunisat ukiup siulianut sanilliukkaanni, ukiup qaammataasa arfineq-pingasut siulliit ingerlanerini 880 tonsip missaanik apparput. Illoqarfinni allani tunisineq aamma apparput, taakkuli Qaqortumisulli ingasatsiginngillat.

 Inuussutissanut suliffeqarnermullu pisortaq, Palle Frederiksen naapertorlugu aalisakkanik tunisaqarfiannginneq kommunimi suliffissaaleqisut amerlinerannik kinguneqarpoq. Tamanna kommunip karsiani septembarimili malugineqarsinnaalereerpoq.

Kiista P. Isaksenip tusagassiutinut marlunngornermi nalunaarutaani kommunip aningaasaqarnerata qanoq innera erseqqissumik allassimanngilaq. Borgmesterili isumalluarpoq.

- Taamaakkaluartoq isumalluarpunga, isumaqarluinnarpungalu 2018-imut missingersuummi inaarutaasumi politikkikkut anguniakkat siunissamut sammisut aningaasaliiffiginissaannut inissaqartitsilluarumaartugut, borgmester allappoq.

AAMMA ATUARUK Tunitsivimmik umiarsualiisoqarnera Kujallermi suliffissaqartitsissasoq

Missingersuutit isertuussat

KNR-ip kommunip aningaasaqarneranik takunnikkusulluni Kommune Kujalleq piffissami sivitsulersumi oqaloqatigiinnissutigisarpaa. Kommunalbestyrelsip nalinginnaasumik kommunimi aningaasaqarneq malinnaaffigisarpaa, kommunit allat pingasut nittartagaanni taakku paasissutissat kommunalbestyrelsit ataatsimiinneranni imaqarniliani takuneqarsinnaasarput.

Kommune Kujalliulli nittartagaani taakku nassaassaanngillat.

Taamaammat KNR-ip Kommune Kujalliup aningaasaqarnerata killiffia pillugu takunnissinnaaneq noqqaassutigaa. Takunnissinnaanermik noqqaassuteqarneq suli akineqanngilaq.