Borgmesteri: Uranimik inerteqquteqalerneq aningaasaliinissamut soqutiginnilersitsissaaq
Uranimik inerteqquteqalerneq nunatta kujataani aningaasaliinissamut soqutiginninnerulersitsissaaq.
Tamanna Kommune Kujallermi borgmesterip, Stine Egedep (IA) ilimagaa.
Taamaammat Inatsisartut uranimik inerteqquteqarlernissamut marlunngormat akuersinerisa saniatigut ilorrisimaarpoq.
- Neriuutigilluinnaqqissaarpara aningaasaleerusuttut aamma inerisaarusuttut massakkut qununnginnerullutik saqqummeralernissaat taava aamma uumasuuteqarnermik inuussutissarsiuuteqartut ernumassuteqannginnerullutik nunarujussuaq tamanna aatsitassarsiorfiup pujoralammik mingutitsisussaajunnaatumik inerisaaqqissinnaanermik periarfissanik atuilissasut, Stine Egede KNR-imut oqarpoq, nangillunilu:
Uranimik inerteqquteqarnermut inatsit:
-
§ 1. Uranimik misissueqqaarneq, uranisiorluni misissuineq aamma piiaaneq akuerisaanngillat.
Misissueqqaarneq, uranisiorluni misissuineq piiaanerluunniit uranimut sammitinneqarani allamut sammitinneqarpat, agguaqatigiissillugu uranimik akoqarnera 100 ppm inorlugu oqimaassuseqarpat, imm. 1-imi aalajangersagaq atuutissanngilaq.
§ 2 Inerteqquteqarneq pinngoqqaatinut qinngornernik ulorianartunik akulinnut allanut aamma atuutissasoq pillugu maleruagassanik Naalakkersuisut aalajangersaasinnaapput.
§ 3. § 1-mut naapertuuttumik piiaasoqarsinnaanngippat, Naalakkersuisut aatsitassanik misissueqqaarnissamut, misissuinissamut imaluunniit piiaanissamut akuersissut sunaluunniit annikillisissinnaavaat imaluunniit uterteqqusinnaavaat.
-
Unioqqutitsinermut akiliisitsinertut ilusilimmik pineqaatissiisoqarsinnaavoq.
- Kinaluunniit qineqqusaarnerup nalaani arajutsisimassanngilaa inuit ernumasut illoqarfik saninnguani aatsitassarsiorfimmik taama annertutigisumik ammaannartumillu mingutitsingaatussamik pilersitsinissaq.
Narsami savaatillit kisimik pinnatik Narsalli kangerluisa eqqaanni savat nunaatillillu savaateqarfinniipput.
Savaatillit aatsitassarsiorfimmit pujoralak uranimik akoqartoq savanut nunaatiminnullu siaruaannissaa ilaatigut ernumassutigisimavaat.
Savaatillit peqatigiiffiat 70-it missaannik ilaasortaqarpoq.
Narsaq nunatsinni eqqartugaasoq
Narsaq nunatsinni politikkikkut ukioq manna eqqartorneqangaatsiarpoq, australiamiummi aatsitassarsiutileqatigiiffiat, Greenland Minerals Kuannersuarni Narsap tunuani aatsitassanik qaqutigoortunik piiaarusuppoq. Tassanili uranimi piiarneqartunut ilaasussaavoq.
Uranimik piianissamut inerteqquteqalerneq pissutigalugu Greenland Minerals aatsitassarsiorfimmi assaasinnaajunnaarpoq, uranimmi inerteqqutaalerneratigut uranip annikinnerpaaffissaanik aamma killiliisoqarpoq. Tassa imaappoq Naalakkersuisut uranip qanoq annertutigisup piiarneqarsinnaanera killilerniarpaat.
AAMMA ATUARUK Urani Naamik Narsaq: Sulinerput uninnavianngilaq
Misussueqqaarnerit, aatsitassarsiornerit atorluaaniarnerillu agguaqatigiissillugu tonsimut 100 gram, tassa 100 ppm, tikillugu uranimik (soorlu Kuannersuarni) akoqarsinnaanerat killeqartinneqarput.
Kalaallit Nunaanni sumiiffinni amerlaqisuni qinngornerit ulorianartut nassaassaammata killilersuisoqarpoq. Nunatsinni Kuannersuit uranimik akulinni tusaamaneqarnersaavoq, aatsitassaq tassani assersuutigalugu uraneqassusaa 300 ppm-ip missaaniippoq (millioneriaataa) kiisalu 800 ppm tikillugu thorium-imik akoqassuseqarluni.
Uranimut naaggaarneq IA-p nunatta kujataani taaguunneqarluarneranik kinguneqartoq
Uranimut naaggaarneq Inuit Ataqatigiit qineqqusaarutaasa annersaraat, IA-lu nunatta kujataani taaguunneqarluarluni qinigaanerpaavoq: Inuit Ataqatigiit Kommune Kujallermi Siumumut qinersisartorpassuaqarfiugaluartumi qinersisut 46,7 procentiinit taaguunneqarpoq, Stine Egedelu borgmesteritut atuuffik Siumumeersumit Kiista P. Isaksenimit tiguaa.
Kiista P. Isaksen kommunimut qinersinermi 186-iinnarnit taaguuneqarpoq. Stine Egedelu 410-nit taaguunneqarluni.
- Toqqilliatsiannartorujussuuvoq Inatsisartutigut massakkut aalajangiiffigineqarnera. Neriuppunga massakkut aalajangerneq ukiorpassuarni attanneqarumaartoq. Isumaqarpunga atsitassarsiornerit taama ittut nunatsinnut inoqarfit eqqaaniissappata pitsaasussaanngittut, Stine Egede oqarpoq.
AAMMA ATUARUK Siumut uranimik inerteqquteqarneq pillugu: Aatsitassarsiorneq aatsitassarsiorfik ataasiinnaq pillugu matuvoq
Inatsisartuni amerlanerussuteqartut inatsisinik uranimik piiaanissamut inerteqquteqarnermut tunngasunik qaqugukkulluunniit allannguisinnaapput.
Uranimik inerteqquteqarnissamut politikkikkut akerliusut tamanna nunatsinni aatsitassarsiornerup ineriartortinneqarneranut aporfiliinissaa ernumassutigaat. Stine Egedeli tamatuma isumaqataanngilaq.
- Kuannersuarni aatsitassarsiornerup matulluni qaminneqarnera allat tamarmik uninnissaannik isumaqanngilaq. Nunatta kujataani aatsitassarsiorfinnik sanaartuinermiittunik suli peqarpoq, taakkulu ammarnissaat qilanaarutigaarput, Kommune Kujallermi borgmesteri oqarpoq.
