Borgmesteri isumalluartoq
Qeqqata Kommunianilu borgmesteri Hermann Berthelsen isumalluarpoq.
- Neriuppugut aallartissinnaassasoq immaqa ukiup ataatsilluunniit ingerlanerani, Hermann Berthelsen KNR-imut taama oqarpoq.
Qeqqata Kommuniani borgmesteri Inuussutissarsiornermut Naalakkersuisoq Vittus Qujaukitsoq peqatigalugu Sverigep avannaani biilinut misileraasarnikkut suliffissuaqarnermi qitiusumik akuusut qanittumi tikeraarpaat.
Taakkualu misileraavimmik pilersitsisisoqassappat nutaanik Kangerlussuarmi suliffissaqarnerulissasoq ilimagaat.
Kangerlussuullu napannarnissaa aamma ilimanarnerulissasoq, borgmesterip tikkuarpaa.
- Tassa pingaartupilorujussuuvoq Kangerlussuaq matuniaqattaarneranut oqalunneri pillugit pitsaaqutai oqaluuserineqalerpata taamaasilluni aamma suliffeqarfiit Kangerlussuarmi pitsaassuseqartut ingerlatissallugit taava aamma saqqummeralernissaat qularnarunnaassaaq, Qeqqata Kommuniani borgmesteri taama oqarpoq.
AAMMA ATUARUK Kangerlussuaq biilinik misileraavittut atoqqinneqalersoq
Biilinik misileraavimmik Kangerlussuarmi ataavartumik pilersitsisisoqassappat assigiinngitsut suliffiusussat pilersinneqassapput.
- Ukioq kaajallallugu ingerlasussaanngilaq kisianni ukiup issinnerata nalaani soorlu oktobariminngaanniit immaqa apriilimut imaluunniit sivisunerulaartumik ingerlanneqartassaaq. Taassuma soorunami suliffeqarfiit pilersissavaat, pilersuinermut tunngasut, arlaatigut biilinut misileraanernut suliaqartut, iluarsaassisarfiit, unnuisarfiit allallu.
Aammali pilersitsineq kommunimut iluaqutaassaq.
- Naatsorsuutigilluinnarpara Qeqqata Kommuniani akileraartartut amerleriaateqassasut sumiuugaluarunilluunniit Hermann Berthelsen oqarpoq.
Kangerlussuarmi biilinik upernaaq manna misileraasoqarsimasoq taassuma aamma eqqaavaa.