Borgmesteri aningaasaliiffigineqarniartunut mianersoqqusisoq
Qallunaat aningaasaateqarfiat, Realdania Byg, Qaasuitsup Kommunia aamma takornarialerinermik suliaqartoq, World of Greenland, upernaaq manna, sulilu kommunalbestyrelsemut qinersisoqanngitsoq, suleqatigiinnissamut isumaqatigiissuteqarput Ilimanami illorsuit pisoqqat marluk iluarsaanneqarnissaannut kiisalu illuaqqanik unnuisarfinnik 15-inik sanaartornermik malitseqartussamik. Isumaqatigiissut 10 million koruuninit minnerunngitsumik aningaasaliiffigiiffigineqartussaq, annerpaata qallunaat aningaasaateqarfiannit Realdania Byg-imiit aningaasaliiffigineqartussaq.
Kisianni kommuunip Ilimanami innuttaasunik ataatsimiisitsinerata kingulliup ingerlanneqareernerani Ilimanarmiut tupaqqapput, maannakkummi Qaasuitsup Kommuniata borgmesteriata suliniummut, avataaniit aningaasaliiffigineqartussamut, tapersersuinnginnini ataatsimiisitsinermi ersersimmagu.
Innuttaasunik ataatsimiisitsineq Ilimanami sapaatip akunnera kingulleq ingerlanneqarpoq. Qaasuitsup Kommuniata borgmesteria Ole Dorph ataatsimiinnermi peqataavoq. Ataatsimeeqataasunulli erseqqissaatigaa borgmesteritut najuutinnginnini:
- Malugisinnaavarput Ole Dorph, naak borgmesteritut najuutinngikkaluarluni, suliamut tassunga imatut tapersersuivallaanngitsoq. Tassa ilimanarmiut peqataatinnginnissaat taanna pinerugamiuk. Avataaniinngooq aqunneqarnissarput taanna iluamik perusunnginnamiuk, Jacob Nedergaard Jessen, ataatsimiinnermi peqataasoq taama oqarpoq. Taassuma Ole Dorphip oqariartuutigisai pakatsissutigivai:
- Imatut oqaatsit ilai sakkortungaluarput, kisianni nunasiaataanermituullusooq aqunneqartutut imatut ersersippaa. Kisianni taannartaa uagut akueriuminaatsipparput taamannak oqalunnera. Uagut nunarput asavarput assut, assullu siumut aallarnissaa kissaatigivarput, Jacob Nedergaard Jessen, borgmesterip suliniummut tapersuinnginnermigut unitsitsisinnaaneranut ernumasoq taama oqarpoq. Taassumali kisimi pakatsissutiginngilaa Ole Dorphip Ilimanami suliniuteqarnissamut malunnartumik akerliunera:
- Taakkua aningaasaliisartunngooq taamaattuungamik. Nunaqarfiinngooq aningaasaliiffigeriarlugit, sanaartorfigeriarlugit, innuttaasunngooq tassunga akulerutsinneqarneq ajoramik. Tassa taamannak nipilimmik oqaluppoq. Uatsinnut taanna sanaartugassaat iluaqutaajunnanngimmat, Karen Johansen, innuttaasunik ataatsimiisitsinermi peqataasoq taama oqarpoq.
Ole Dorph Ilimanap ungasinngisaani nunaqarfimmi Oqaatsuni hoteliuteqarpoq, aammalu Oqaatsuni neriniartarfimmik H8-mik piginneqataaleqqammerpoq. Taamaattumik Ilimanami suliniummut tapersersuerpalaannginnera eqqarsarnartoqartinneqarpoq, nammineq ingerlataminut unammillertussanngortussaassammata. Tamaattoqannginnerarpaali:
- Naamerluinnaq. Uanga isumaqarpunga takornariat tamarmik inissaqartut sumiikkaluarunilluunniit. Uanga massakkut ingerlatara Oqaattuni imaluunniit H8 assigiinngittullu taakkua namminneq ingerlassapput. Massakkut uanga taakkununnga toqqaannartumik akuunngilanga. Kisianni uunga attuumassuteqanngilaq, Ole Dorph oqarpoq.
Ole Dorphip naqissuserpaa Ilimanami suliniummut akerliulluni oqariartuuteqarnerminut tunngaviusoq nunaqavissut aningaasaliisunit akuutinniarneqannginneri:
- Taanna pilersaarut, Realdaniakkut pilersaarutaat Ilimanamut tunngatillugu, uanga ajorinngilara. Uangaana una ajorigiga pilersaarummut taama angitigisumut maani nunaqavissut, allaat ilimanarmiut pularusuttut, piginneqataalerusuttut sooq periarfissinneqarsinnaannginnerat. Taannaana uanga ippigigakku massakkut oqariartuutigigiga, Ole Dorph oqarpoq.
Ole Dorphip ilanngullugu oqaluttuaraa nammineq inuttut siorna Qaasuitsup Kommunianit Realdaniamillu aggersarneqarsimanini aperineqarsimagaluarninilu suliniummut peqataarusunnginnerluni. Namminerli Ilimanarmiut suliniummut peqataatinneqarnissaat kissaatigigamiuk neqeroorutaannut akuersaarsimanngilaq.
