The Blues unnugu takuteqqaarneqassaaq

Nunatta Isiginnaartitsisarfiata nipilersuutigaluni isiginnaartitsissut nutaaq "The Blues" siullerpaamik takutissavaa. Isiginnaartitsissut Arctic Winter Games 2016-imut atatillugu Isiginnaartitsisarfiup pilersitaraa.
Assi © : Nunatta Isiginnaartitsisarfia
Allattoq Karsten Sommer
marsip 03-at 2016 06:15
Nutserisoq Simon Uldum -

Erinarsortartut arnat marluk sallersaassapput - erinagissorsuaq sallaatsunillu erinarsortartoq Marianne "Varna" Nielsen aamma Marie Mathiassen asanninnermik ilungersuuteqarluni erinarsortuusoq.

Marie Mathiassenip nuuteeqqamik saqqummersitaa "Maalia Juunalu" nuannarineqartupilussuuvoq, Nunattali Isiginnaartitsisarfiata isiginnaartitsissutaani erinnat bluesiusut atorneqassapput.

Erinarsortartut pikkorissorsuarnik nipilersortoqassapput - Nunatsinneersut, Italiameersut Skandivaniameersullu. Ilaatigut tassaallutik Nino Fencker, Fabrizio Barzanti, Anders Øgaard, Ulrik Wigh aamma Odda Eilertsen.

Bolatta Silis-Høegh isiginnaartitsiviup kiluanik atisanillu aaqqissuisuuvoq, atuakkiortoq Niviaq Korneliussen oqaasertassanik suliarinnittuulluni, Sverigemeersorlu Jerker Fahlström ilitsersuisuuvoq.

Aamma atuaruk Nunatta Isiginnaartitsisarfiani takutitsinermut sungiusartut alakkarsinnaavatit

Isiginnaartitsisarfik misiliinissamut tamanut ammasumut qaammat kingulleq qaaqqusivoq, isiginnaartullu isiginnaartitsissutip suliarineqarnerata takunissaanut periarfissinneqarput.

Nuummi innuttaasut minnerunngitsumillu Arctic Winter Gamesimut peqataasussat isiginnaartitsissut Isiginnaartitsisarfiup illuutaani Industrivejimiittumi unnugumit takusinnaassavaat.

Isiginnaartitsissut marsip qulingata tungaanut unnuit tamaasa takutinneqartassaaq, sapaat minillugu. Isiginnaartitsinerlu nalunaaqutaq 20.00 aallartittassaaq.