Assi: Pixabay

Bitcoinit aningaasannanniutiginerat nunatsinni atugaagaluttuinnartoq

Nunatsinni innuttaasut Bitcoininik niueruteqartut amerligaluttuinnarput. Sukkasuumik iluanaarutaasinnaanera amerlaqisut pileritsaatigisarpaat, aningaasalli digitaliusup unnuaannarmut naleerussinnaanera eqqumaffigineqartariaqartoq, immikkut ilisimasallip oqaatigaa.

"Sunnguamilluunniit iliuuseqarnak aningaasarsiornissannik ikiorsinnaavakkit", imaluunniit ”Aningaasat nammineq sulisikkit". "Attaveqarfiginnga, taava aningaasarsiupallannissannut ikiussavakkit.'

Bitcoininut aningaasaliinissamik neqerooruterpassuit Facebookikkut ingerlaartinneqartut ilaat taama oqaasertaqarput. Bitcoin Miningimi Nunatsinni, nunarsuup sinnerasulli, atugaasupilussuanngorsimavoq.

Bitcoin aningaasaavoq digitaliusoq, naalagaaffiit aningaasaannut, soorlu koruunimut, dollarimut pundimullu naleqqiullugu qitiusumik aningaaserivimmit toqqammaveqanngitsoq. Taamaammat Bitcoinip aamma aqagu pisussutaasinnaaneranut qularnaveeqqutissanngilaq.

Taamaakkaluartoq Bitcoin Miningip peqataaffiginissaanut nalunaartut amerlasuupilussuupput. Nalunaarnermi bitcoiniutigisat minerinik attaveqaqatigiinnut aningaasaliissutigineqartarput. Miningimillu taagorneqartoq aallartikkaangat arlaatigut iliuuseqarani bitcoininik 2,50 koruuninit 25 koruuninut ullormut iluanaaruteqartoqarsinnaavoq.

Aningaasarsiornerorusukkaannili allat akiliillutik miningimut ilanngunnissaannut ikiuisoqarsinnaavoq taamaaliornikkullu amerlanerusunik aningaasarsiorluni.

Mathias Sakariassen Bitcoin-mineriuvoq. Aningaasat katersani atorlugit Bitcoin-miningimi mining-poolimik pisinermigut Bitcoin-minerinngorpoq. Minerimit allamit ikiorneqarluni akiliuteqarnermigut Bitcoinip silarsuaa appakaaffigaa.

- Aningaasaatikka isumatusaartumik atorusukkakkit taamaaliorpunga, Mathias Sakariassen KNR-imut taama oqarpoq.

Aningaasap digitaliusup nalitusiartornerata peqatigisaanik ullumikkut aningaasarsiorluni oqaatigaa, aammali allat miningimut aningaasaliinissaannut ikiuinermigut aningaasarsiorpoq. Bitcoin-miningimi pyramidespilimut assersuunneqarsinnaavoq.

- Bitcoin-mineritut arlaatigut iliuuseqanngikkaluarluni aningaasarsiortoqarsinnaavoq. Aningaasaliissutigisat sukkasuumik utertikkusukkaanni, allat Bitcoin-miningimut peqataanissamut nalunaarnissaannik ikiuisoqarsinnaavoq, Mati Sakariassen, ullut akissarfiusut nalaanni ulapinnerusarluni oqartoq, taama oqaluttuarpoq. Taamaammat miningimut peqataaniarlutik akileerusuttut amerlapput.

Mati Sakariassen naapertorlugu, tamanna imminut minerinngortunullu pissarsissutaasarpoq.

Bitcoin-mining naatsumik nassuiassagaanni, minerip alla minerinngornissaanik ikioruniuk taava pointinik aalajangersimasumik amerlassusilinnik pissarsissaaq. Taakkulu assersuutigalugu dollarsinik naleqartarput. Minerinngortitaalu allamik ikiuippat, taava siulliulluni minerinngortitsisoq aamma pointinnaqataassaaq, soorlu aamma minerinngortitaata minerinngortitaa pisippat pointinnassalluni. 

Taamaammat aningaasanik amerlasuunik iluanaaruteqarusukkaanni Bitcoin-miningimut allanik ilassarsiortoqartariaqarpoq.

Bitcoin-mineri kalaaleq alla tassaavoq Malik Lynge Petersen. Taanna Bitclub Networkimut nunarsuaq tamakkerlugu atuuttumut ilaasortaavoq. Taassuma nunatsinni Bitcoininik Bitcoin-miningimillu pisisimasut 600-nit amerlanerussangatippai.

Miningimilli attaveqaqatigiinnut nammineerluni akiliuteqarluni ilannguttoqarsinnaanngilaq. Tamanna ilaasortaareersumit innersuussutigineqarnikkut aatsaat pisinnaavoq. 

Katersugassaq digitaliusoq

Aningaasaatit Bitcoininut atornerisigut iluanaaruteqarluartoqarsinnaaneratut isikkoqaraluartoq, Bitcoinip nalinga arlaatigut toqqammavissaqartinneqannginnera eqqumaffigineqartariaqarpoq.

Aningaasalersuinermik suliffeqarfiup Lundgreen’s Capitalip piginnittua, Peter Lundgreen, taama isumaqarpoq.

- Sanilivit ilinnit amerlanerusunik akiliinissani piareersimaffigippagu, tamanna ajunngilluinnartuussaaq, nalingami taamaalilluni qaffakkaluttuinnassammat, toqqammavissaqanngilarli, Lundgreen taama oqarpoq.

Bitcoinit katersorneqartartunut assersuuppai, soorlu aningaasat pisoqqat imaluunniit isissiaviit ilusilersuisartumit tusamaasamit sanaat.

- Taamaattoqarnera assut alutornarpoq, suliannut tunngatillugu taama isumaqarpunga. Inuit aningaasaatimik qanoq inissisimanerinut qanoq pissusilersornerat takusinnaallugu alutornarpoq, Lundgreen KNR-imut taama oqarpoq.

Bitcoinit killilimmik amerlassuseqartillugit tunniunneqartarput. Tassalu Bitcoinit 21 millionit. Ima paasillugu, Bitcoinit 21 millionit tunniunneqareerpata bitcoininik allanik tunniussisoqassanngilaq.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!