Assi: KNR

KNR: Biskopip Sofie Petersenip ullaakkut Biibilimit atuaasarnerit peerneqarneri pillugit KNR-imit isornartorsiuineranut akissut

Siullermik erseqqissaatigissavara Biibilimit atuaasarnerup KNR-radiomit peerneqarneranut aalajangerneq imatut paasineqassanngimmat upperisamut kristumiussutsimullu tunngasunik aallakaatitsisarnianngitsugut. Kristumiussuseq kinaassutsitsinnut ilaammat KNR-imit akueraarput. Siunissamissaaq upperisaq aamma kristumiussuseq sammisarniarpavut, taamaaliortarnissarpullu sungiusimasatsinnit allaanerussaaq.

Innuttaasunik kiffartuussisussaatitaasutut aallakaatitassiornitsinni sapinngisamik amerlanerpaat pisariaqartitaannik matussusiiniarluta apuussiniartussaavugut. Nunatsinni ajoraluartumik radiokanali KNR-imi ataasiinnaq pigaarput, taannalu aqqutigalugu apuussivigisassaraavut meeqqat, inuusuttut, inersimasut aamma utoqqaat. Taakkunanilu makku sammineqartarlutik eqqumiitsuliorneq kulturilu, timersorneq, nutaarsiassat, ilinniartitaaneq peqqissuserlu. Tassa pisussaaffipput innuttaasunik kiffartuussisussaatitaasutut aallakaatitassiorfiit allat assigalugit. Suliassaq tamanna imaannaanngeqaaq, ilungersortuarpugulli sapinngisamik pitsaanerpaamik tunniussiniarnitsinni nukiit periarfissallu pigisavut tunngavigalugit.

Biibilimit atuaasarneq eqqarsaatigalugu tamanna ukiorpassuarni ingerlassimavarput, aallakaatitseriaaseq allanngortinnagu. Tassani inuk ataaseq biibilimit atuaasarpoq, ataatarpoorluni imaluunniit pilluaqqussummik atuaalluni tussiummik tullilerlugu. Atuisutsinnik misissuinitsinni paasivarput inuit 18-init 34-nut ukiullit aallakaatitseriaatsimik tassannga angusinnaanatigik naak kissaatigigaluarlugu, misissuinermimi erserpoq naalaartartut taakku aallakaatinneqartartumik taassuminnga naalaanngisaannartut imaluunniit annikitsuinnarmik naalaartarput.

Naalaartartut immikkoortut tullii 35-nit 55-inut ukioqartut annikitsuinnarmik aallakaatinneqartartumik taassuminnga naalaartarput. 56-inik taakkulu sinnerlugit ukiulinnut pigutta, taakku naalaartartut aallakaatinneqartartumik taassuminnga annertuumik malinnaasartut malunnarsivoq. Tamanna imatut paasineqassaaq KNR-imi biibilimik atuaasarneq aamma naalagiarnernik aallakaatitsisarnerit naalaartartut taamaallaat inuit pingajorarterutaannit soqutiginartinneqartut.

KNR aallakaatitassiortarusuppoq naalaartartut immikkuutitaarnerinit sapinngisamik amerlasuunit soqutiginartinneqartunik, tassaniipporlu biibilimit atuaasarnerup taamaatinneqarnissaanut aalajanngernerup tunngavia. Soorlu aallakaatitassioriaatsitta nassuiarnerani siusinnerusukkut radiomi oqaatigereeriga, kulturi tassaanngilaq upperisaq, kisianni upperisaq kulturitta ilagigaa, tamannalu pissutigalugu aallakaatitassiat upperisamut sammisunik imaqartut aallakaatitassianut kulturimut tunngasunut ilanngunneqassasut. 

Aallakaatitassianik nutaanik aallartitsissaagut naalaartartunut 18-init 55-inut ukiulinnut saaffiginnittumik taakkununngalu soqutiginarsakkamik. Aallakaatitassiani taakkunani KNR aallartissaaq kulturimut aaqqissuisoqarfiup isumagisaanik, sammineqartassallutik upperisaq, inuuneq upperisarsiornerlu, sapaatit akunneri tamaasa aallakaatinneqartartussamik. Tassani aallakaatitassiortartut itinerusumik upperisarput, inuunerput aamma upperisarsiornerput itinerusumik sammisassavaat eqqartortittassallugillu. Aallakaatitassioriaatsit allat assigalugit aallakaatitsivimmi pulaartoqartassaaq aamma/imaluunniit innuttaasut peqataatinneqartassapput telefoni SMS-lu aqqutigalugit, aammattaaq qarasaasiaq atorlugu tusagassiuutit allat aqqutigalugit. Isumaqarpugut taamaaliornitsigut naalaartartut peqataanerulertissinnaallugit, taamaaliornitsigullu upperisaq, inuuneq aamma upperisarsiorneq pillugu oqalliseqataanissamut tunngavissiisinnaassalluta. Tamanna uanga paasinnittaasera naapertorlugu inuiaqatigiinnut naleqartunik annertunerusunik pilersitsissaaq, aallakaatitassiap taamaallaat naalaartartutta pingajorarterutaannik soqutigineqartup ingerlatiinnarnissaanut sanilliullugu, kiisalu periuseq atorneqartussaq ullutsinni sungiusimaneqartunut naleqqunnerussalluni. 

Inuit inussiarnersumik qinnuiginiarpakka naammagittarnerulaaqqullugit aallakaatitseriaatsip nutaap eqqukkiartuaarnerani, radiokkut aallakaatitsisarneq nutaaq ukiorpassuarni sungiusimasatsinnit allaanerungaatsiartussaammat. Periusermi tunngavigineqartoq ukiuni amerlasuunngortuni inuit naalaartarnerminni ileqquinik misissuisarsimanerit toqqammavigalugit ilusilersugaavoq, tamanna radiomik aallakaatitsisarfippassuit nunani allani atulereerpaat. Taamatuttaaq radiomik nalunaaqutaq arfineq-marluniit unnukkut arferngup tungaanut aallakaatitseqqinnata aallakaatitsisarusuppugut, kiisalu isumalluutinik nukiit periarfissallu pigeriikkatta saniatigut allanik pissarsinissatsinnut periarfissaqartitsisoqanngimmat, taava periuserput allanngortittariaqarparput, naalaartartut aamma piginnittut radiokkut aallakaatitsinerusalernissamik piumasaat naammassiniarlugit.

 

Inussiarnersumik inuulluaqqusillunga
Karl-Henrik Simonsen

 

 

Paasissutissat sukumiinerusut ukunani pissarsiarineqarsinnaapput: KNR-imi pisortaq, Karl-Henrik Simonsen khs@knr.gl aamma KNR-imi radiop pisortaa, Masaana Egede meg@knr.hl oqarasuaat +299 36 15 00

Isummersuutit

Attavissaq

KNR attaviginiarukku ataani immersuivik atorlugu allaffigisinnaavatsigut emailikkulluunnit info@knr.gl

imaluunniit uunga

KNR | Box 1007 | Issortarfimmut 1A | 3900 Nuuk

Tlf. (+299) 361500 | Fax. (+299) 361502

Akineqarusukkuit email allaguk. Inuttut pisinnaatitaaffitit ataqqillugit emailadressit allanut tunniunneq ajorparput
Suna pillugu attaviginiarpitigut?
Oqaatigerusutatit uani allakkit