Birthe Rønn Hornbech: Siunnersuut akuersaarneqarsinnaanngilluinnarpoq
Folketingimi Venstremi ilaasortap inatsisilerinermullu tunngasuni oqaaseqartartup kiisalu kalaallit qallunaallu Namminersorneq pillugu isumalioqatigiissitaanni ilaasortap Birthe Rønn Hornbech-ip, kalaallit Danmarkimi najugallit suliffeqanngitsullu ikiorsiissutaasa peerniarneqalernerat tupigusuutigaa akuerisinnaanagulu.
-Akuerisinnaanngilluinnarpara kalaallit Danmarkimiittut immikkut isiginiarneqalernerat immikkullu maleruagassaliuunniarneqarnerat. Maleruagassat tamanut assigiimmik atuupput, taamaaginnassaarlu, Birthe Rønn Hornbech oqarpoq.
Ilanngullugu oqarpoq, kinaluunniit suliffissaqanngitsoq suliffimmik tunineqarnissaminik piareersimassasoq, suliffissaqanngivikkunilu suliaqarnissaminik ikiorneqassasoq, qallunaatullu oqalussinnaanngikkuni ilinniartinneqassasoq. Maleruagassat suminngaaneeraluaraanniluunniit atuupput, franskiugaanni tyrkeriugaanni kalaaliugaanniluunniit, Birthe Rønn Hornbech oqarpoq.
-Kalaallit uanga isinnik qallunaajupput. Kalaallit, qallunaallu Jylland-idimeersut Fyn-imeersullu soorunami tamarmik assigiinnik maleruagassaqassapput. Allatut isigalugit pissanngilagut aamma allatut pinnikkusunngilagut. Kalaallit qallunaajupput naalagaaffeqatigiinnermullu ilaallutik. Soorunami aamma savalimmiormiut uani eqqarsaatigaakka, Birthe Rønn Hornbech oqarpoq. Saqqummiunneqartoq siunnersuutitut isigisinnaanagu aamma oqarpoq, isumaqarporlu, inuit isumaannik takutitsineruinnartoq, tamannalu akuerisinnaanagu.
Danmarkimi kommuneqarfiit kattuffianni chefkonsulenti Birger Mortensen-ip naqissuserpaa, ikiorsiissutinut maleruagassat nunarsuarmit suminngaaneeraluaraanniluunniit tamanut assigiittut.
-Kommunit pisussaaffigaat ikiorsiissutinik pisartut suliffimmik neqeroorfigissallugit imaluunniit qallunaatut ilinniarnissaannik neqeroorfigissallugit. Neqeroorutillu tigujumanngikkaanni ikiorsiissutit peerneqartarput, tamannalu tamanut atuuppoq.
