Birnanut tunngasoq immikkuullarissorujussuuvoq

Islandimi toqutsisoqartarpoq. Misissuinerli, toqutsineq, eqqartuussineq ukkatarineqarnerlu Islandimi pisarsimasut allat assiginngilai.

- Kalaaleq, Thomas Møller Olsen Birna Brjánsdottirimut toqutsisimasutut hashimillu 23 kiilumik anngiortumik eqqussisimasutut ullumi eqqartuunneqarluni ukiuni 19-ini parnaarussaasussanngortinneqarpoq.

Unnerluussisussaatitaasoq, naalagaaffiullu eqqartuussissuserisua tullia, Kolbrún Benediktsdóttir naapertorlugu eqqartuussut sakkortuvoq.

AAMMA ATUARUK Birnamik toqutsineq ikiaroornartulerinerlu ukiuni 19-ini parnaarussaassutigissagaa

Islandimi suliaq nalinginnaanngitsuusoq, unnerluussisussaatitaasup oqaatigaa.

- Uanga suliamik allamik eqqaamasaqanngilanga, niviarsissap illoqarfimmiit angerlanngitsoorsimaneranik suliamilluunniit taamatut isikkulimmik, soorlu uani pineqartumi nalaassisimanermik, unnerluussisussaatitaasoq oqarpoq.

Islandimi pinerluttup toqutaasullu imminnut ilisarisimasariinnginneranni toqutsisoqartarnera qaqutigoortuusoq, Kolbrún Benediktsdóttir oqarpoq.

- Eqqartuussut nalinginnaasumit sakkortuneruvoq. Islandimi toqutsisoqarsimatillugu pineqaatissiisarneq nalinginnaasumik ukiunik 16-inik sivisussuseqartarpoq. Thomas Møller Olsenilli ukiunik 19-inik pineqaatissinneqarnerani toqutsineq hashimillu anngiortumik eqqussineq ataatsimoorput.

Thomas Møller Olsenilli qanoq toqutsisimanera qanorlu uppernarsaataasinnaasunik toqqorteriaraluarnera, inuttaaqatiminullu eqqartuussivimmi pisuutitseriaraluarnera pineqaatissinneqarneranut sakkortusaaqataapput, unnerluussisussaatitaasoq oqarpoq.

AAMMA ATUARUK Unnerluussisussaatitaasup eqqartuussut naammagisimaaraa

Toqutsisoqarnerani suliaq nunarsuarmi tamarmi tusagassiorfinnit ukkatarineqarpoq, islandimiorpassuarnulli pingaartumik sunniuteqarpoq.

- Suliaq aallarteqqaarmat niviarsiap tammaaneqartup ujaarineqarneranut tunngavoq, kikkut tamarmik ujaasipput – taamaammat islandimiut tamangajammik suliap aallarteqqaarneraniilli
peqataalerput.

Ukkatarinninnerlu taama annertutigitillugu oqartussat politiillu suliaqarnerannut tamaviaartitsivoq. Taamaammat suliamik aallussinissaq sunnertinnginnissarlu pingaartorujussuusimasoq, unnerluussisussaatitaasoq oqarpoq.

- Suliamik matumatut ittumik suliaqartilluni sunnertinnaveersaartoqartussaavoq. Suliammi allatulli suliarineqartussaapput.

Soorlu aamma unnerluussisussaatitaasumut suliaq imaannaagitsuusimavoq.

- Suliami pineqartut inuttut eqqartorneqarput, uangalu isumaqarpunga tamanna eqqumiitsoq, Kolbrún Benediktsdóttir oqarpoq.