Biologi: Puisit kaattarnerat pissusissamisoorpoq
Kalaallit Nunaat puisinik qalaarpoq. Puisit amerliartuinnarput, taamaalillutillu nerisassaaleqiartorput sanigoriartorlutillu. Ilaatigut tamakkua Flensborgimiit Norge angullugu aviisinik atuartartut KNAPK-p siulittaasuata Leif Fontainip ukiortaami oqaaseqaataaneersut atuarsinnaavaat.
Taamaattorli biologi puisit pillugit suliaqartoq, Aqqalu Rosing Asvid, puisit pillugit ernumassutissaqanngitsugut oqarpoq, annertunerusumik paasissutissanik pigisaqartoqanngimmat puiserpassuit aalisarnermut aarlerinartorsiortitsinersut oqaatigineqarsinnaanngitsoq.
- Tamanna assut oqaaseqarfigiuminaappoq. Annertunerusumik oqaaseqarfigisinnaanngilarput. Ilisimasaqarfigivallaanngilarpummi. Kisiannili aataat Upernaviup kujaataaniit ammassattornerusarput. Aammalu eqalukkanik nerinerusarlutik. Tassa taakkua nerinerusarpaat. Taakkualu aalisagaqassutsimut qanoq sunniuteqarnersut oqaatigiuminaappoq. Saarulliit nerisartagaannik nerisarput. Taamaattumik takorloorneqarsinnaavoq saarulliillu nerisaminnik unammisut. Kisiannili oqaaseqarfigiuminaatsipparput, annertunerusumimmi paasissutissaateqanngilagut, Aqqalu Rosing Asvid Pinngortitaleriffimmeersoq oqarpoq.
Taassuma KNAPK-ip siulittaasuata puisit akornanni kaannersuaqalersinnaaneranut ernummateqarnera tunngavissaqarsorivallaanngilaa. Aap, puisit amerlasuut kaattalissapput, tamannali pissusissamisoorluinnartoq oqarpoq:
- Puisit amerliartortillugit saluttut naammattoorneqartarnissaat ilimanarluinnarpoq. Tamanna pissussissamisuuginnarpoq. Tassami puisit amerlassusissartik naleqqussartussaavaat, Aqqalu Rosing Asvid, Pinngortitaleriffimmeersoq oqarpoq.
KNAPK-ip siulittaasuata puiserpassuit ernumanartoqartillugit oqariartuuteqarneranut tunngaviuvoq EU-p puisit amiinik eqqusseqqusiunnaanera. Eqqusseqqusiunnaarneq kalaallit puisit amiutaannut atuutinngikkaluarpoq, taamaattorli amminik soqutiginnikkunnaarnermut patsisaanerarnetarpoq.
EU-mi puisit amiinik tuniniaanermi Danmarki akisussaaffimminik sumiginnaanerarlugu, Aalisartut Piniartullu Kattuffiat KNAPK ukiortaami oqaariartuuteqarpoq.
