Aningaasanut inatsit 2018: Sulinermut ilanngaat isertitakkaanit aningaasalersorneqarsinnaasoq

Innuttaasut aningaasarsiakinnerusut akileraarnikinnerusalernissaat Naalakkersuisut siunnersuutigaat, akunnattumillu aningaasarsiallit sulinermut ilanngaateqalersinneqarnerisigut innuttaasut aningaasarsiakinnerusut, akunnattumillu aningaasarsiallit aningaasanik pisissutaasinnaasunik amerlanerusunik peqalernissaat naalakkersuisunit anguniarneqarpoq.

Sulinermut ilanngaat aningaasanut inatsimmi nikisititerinerit aqqutigalugit aningaasassaqartinniarneqarpoq, assersuutigalugu isertitaqqortuut akileraarnerunerisigut, tassa topskatimik atuutilersitsisoqarneratigut, matussuserniarneqarlutik.

AAMMA ATUARUK Aningaasarsiorneq siuariartorunnaamisoq

Aningaasarsiakinnerusut akileraarutaat appartinneqarnerisigut, akunnattumillu aningaasarsiallit suliffeqarnermut ilanngaaserneqarpata suliffeqarnerup imminut akilersinnaanerulernissaa eqqarsaataavoq.
Suliffeqarnermut ilanngaat assersuutigalugu 15 procentiuppat SIK-p akissarsiaritittagaannik annikinnerpaaffilerlugu innuttaasumut ukiumut 180.000-it koruuninik aningaasarsiaqartunut ukiumut 8000 koruunit missaannik pisissutissaqarnerulersitsissaaq.

Suliffeqarnermi ilanngaat aqqutigalugu inuiaqatigiinni naligiinnerusoqalernissaa siunertaavoq, aningaasanullu inatsimmi nikisititerinikkut aningaasalersorneqassalluni.

Sulinermulli ilanngaat qanoq aningaasalersorneqassanersoq Naalakkersuisut aalajanginngilaat, siunnersuummi Inatsisartuni oqallisigineqaqqaassaaq, assersuutigalugulu topskat atuutilersillugu sulinermut ilanngaat aningaasalersorneqassanersoq Inatsisartuni aalajangerneqassalluni.